NTAWV NTSHIAB HAUV HNUB TIM 12 LUB 7 HLIS 2021

HNUB OB, LIS PIAM 15 CAIJ NRUAB XYOOS (XYOO TAB)

PHAU NTAWV KEV TSIV (KT 1: 8-14, 22)

Muaj ib tug vaj tshiab sawv los kav Hais Nkws Tos teb. Nws tsis paub txog Yos Xes. Nws hais rau nws cov neeg tias "Cov neeg His Xas Lais coob tshaj peb thiab muaj zog tshaj peb lawm. Peb yuav tsum nrhiav ib zag tswv yim yuam kom lawv tsis txhob huam vam ntxiv. Yog tsis ua li ntawd mas ntshai tsam thaum muaj tsov rog, ces lawv mus nrog cov yeeb ncuab koom siab. Mas peb cov yeeb ncuab yuav coob heev, tsam lawv tig rov ntaus rog rau peb kom tau tawm hauv lub teb chaws no mus."

Ces lawv tsa ib cov thawj saib hauj lwm yuam cov His Xas Lais kom ua hauj lwm hnyav hnyav raws li lawv txib, kom cov His Xas Lais lub neej txom nyem. Cov His Xas Lais thiaj ua hauj lwm hnyav txhim tsa tau ob lub nroog muaj tej txhab ntim qoob rau Fas Las Oos, yog ob lub nroog Pis Toos thiab Las Mas Xes.

Tab sis lawv yim ua kom cov His Xas Lais txom nyem, cov His Xas Lais yim huam coob ntxiv, lawv nyob thoob qhov txhia chaw. Ces neeg ntshai cov His Xas Lais.

Cov Hais Nkws Tos yuam kom cov His Xas Lais ua hauj lwm tas mus li, mas lawv lub neej txom nyem kawg, vim lawv ua hauj lwm hnyav : lawv do av, npaj av, puab thwv cib, thiab lawv ua ntau yam hauj lwm hnyav nyob nruab liaj nruab teb. Luag yuam lawv ua txhua tsav txhua yam hauj lwm.

Fas Las Oos ceeb toom li no rau nws cov neeg tias "Cov His Xas Lais yug tau pes tsawg leej tub, mas nej muab pov rau hauv tus Niam Dej, hos cov ntxhais mas, nej cia nyob."

MAS TAIS NTAWV MOO ZOO (MT 10: 34-11:1)

Yes Xus hais tias "Nej txhob xav tias kuv coj kev thaj yeeb tuaj rau lub ntiaj teb. Kuv tsis coj kev thaj yeeb tuaj, kuv coj hniav ntaj hniav riam tuaj.

Kuv tuaj ua kom tub sawv los tiv txiv, ntxhais sawv los tiv niam, nyab sawv los tiv poj. Ua li mas yus cov yeeb ncuab yog cov neeg nyob hauv yus tsev.

Tus nyiam nws niam nws txiv dua kuv, nws tsis tsim nyog nrog kuv. Tus nyiam nws tej tub tej ntxhais dua kuv, mas nws tsis tsim nyog nrog kuv.

Tus tsis kwv nws tus ntoo cuam thiab tsis raws kuv qab, mas nws tsis tsim nyog nrog kuv.

Tus nrhiav nws txoj sia, nws ua nws txoj sia ploj, hos tus ua nws txoj sia ploj vim kuv, mas nws nrhiav tau nws txoj sia lawm.

Tus txais nej, mas yog nws kuj txais kuv. Tus txais kuv, mas yog nws txais Tus xa kuv tuaj.

Tus txais ib tug yaj saub, vim tus ntawd yog yaj saub, nws yuav txais koob haum phim tus yaj saub. Tus txais ib tug neeg ncaj, vim tus ntawd yog neeg ncaj, mas nws yuav txais koob haum phim tus neeg ncaj.

Kuv hais tseeb rau nej, leej twg pub dej rau ib tug neeg me me no haus, vim tus no yog ib tug thwj tim, tab yog ib khob dej txiag xwb, tsis kav, nws yuav tau txais koob haum."

Thaum Yes Xus qhia nws kaum ob leeg thwj tim tas lawd, nws tso qhov chaw ntawd tseg, nws mus qhia thiab nthuav lub Moo Zoo rau hauv lawv cov nroog.