YAM TSHWJ XEEB TSHAJ PLAWS HAUV KEV TSOB HWB YOG TXUAG NEEG KEV NOJ QAB NYOB ZOO

Lis piam tas los Vaj Qhia Fas Ntshis Kus tau mus phais hnyuv nyob hauv lub tsev kho mob Ntses Mes Lis (Gemelli) hauv Los Mas, Is Tas Lias teb. Ces hnub chiv tim 11 lub 7 hli no, Vaj Qhia thiaj nthuav Tswv Ntuj Lo Lus raws kab ke tus Tshiab Xa Xov nyob saum txheej kaum hauv lub tsev kho mob rau cov ntseeg tau mloog.

Vaj Qhia zoo siab kawg nkaus rau qhov tias nws muaj zog tawm los nthuav Tswv Ntuj Lo Lus hauv hnub no rau sawv daws tau mloog, thiab Vaj Qhia ua sawv daws tsaug uas tau thov Ntuj pub rau nws thiab nrog nraim nws tsis tseg.

Vaj Qhia nco txog Ntawv Moo Zoo hauv hnub no yog hais txog Huab Tais Yes Xus xa cov thwj tim mus tshaj lub Moo Zoo. Lawv tau muab roj pleev ntau tus neeg mob kom rov zoo tuaj. Cov roj no yog cov roj ntshiab siv nyob hauv lub Cim Pleev; yog pleev neeg lub cev thiab lub siab kom huv, yog lub tshuaj pleev kom neeg ‘mloog’, ‘nyob ze’, ‘txhawj xeeb’, ‘ua lub siab muag tu thiab saib xyuas cov neeg muaj mob’ kom lawv qhov mob ntaug tuaj.

Vaj Qhia hais tias peb sawv daws vam ntsoov tias peb yuav tau txais ‘kev pleev’ no nyob hauv peb txoj sia, thiab peb muaj cuab kav pub rau lwm tus tau nyob hauv peb kev mus xyuas lawv, hu xov tooj nrog lawv sib tham, los yog cev tes mus pab lawv.

Vaj Qhia piav txog nws kev kho mob zaum no tias cov kws kho mob mob siab tu thiab saib xyuas nws zoo heev. Li ntawd, Vaj Qhia kuj vam tias nyob hauv txhua lub tsev kho mob, lawv yuav tu thiab saib xyuas cov neeg mob kom zoo li no tib yam nkaus. Txhob pub lub txiaj ntsim no ploj mus, yuav txuag cia.

Kawg no, Vaj Qhia thov txhawb zog rau cov kws kho mob thiab cov tub lis dej num sawv daws, thiab kom peb sawv daws sib pab thov Ntuj rau cov neeg mob, tshwj xeeb tshaj mas yog cov poob rau hauv kev txom nyem.

Vaj Qhia thov Ntuj tias “Thov kom txhob muaj ib tug neeg twg raug tso pov tseg ua ntsuag nos nyob hauv lub zim txwv no, thov kom Tswv Ntuj pleev peb sawv daws nyob hauv kev mloog, nyob ze, thiab tau kev saib xyuas zaum no. Niam Mab Liab koj pab cev peb cov lus thov rau Huab Tais Tswv Ntuj yuad!”