KEV SIB KIS KAB MOB UA CHAW SIB NRUG NTAWM COV NEEG NPLUA NUJ THIAB PLUAG

Tus kab mob COVID-19 sib kis, ua rau kev lag luam thiab kev ncig tsham teb chaws poob qis heev. Tsis tas li ntawd, kuj ua kev sib nrug ntawm cov neeg nplua nuj thiab cov neeg pluag txom nyem. Cov neeg pluag uas khwv tau nyiaj tsawg ntau plhom leej nyob Thaib teb poob hauj lwm, vim kev lag luam thiab kev ncig tsham teb chaws.

Ua rau tsoom pej xeem ntau plhom leej muaj nuj nqis thiab tsis muaj peev xwm nrhiav tau nyiaj los yug lawv tsev neeg. Cov pej xeem pluag thiab txom nyem lawv lub neej poob qis los tau 1 xyoos, tab sis cov neeg nplua nuj tshaj 50 leej nyob hauv lub teb chaws xam pom tias lawv nplua nuj ntxiv li 20 feem pua. Muab lawv cov nyiaj los sib sau ua ke, mas tau li ntawm 160,000 plhom dos las raws kev soj ntsuam cov neeg nplua nuj nyob thoob ntiaj teb.

Hos cov neeg pluag ntau plhom leej nyob thoob Thaib teb, lawv poob hauj lwm thiab nrhiav tsis tau hauj lwm ua, ces ib txhia tshuav nuj tshuav nqi ntau thiab lawv tsis pom qab nrhiav nyiaj los yug lawv tsev neeg.

Cov neeg tsis muaj vaj tse nyob kuj muaj coob tuaj nyob hauv tuam ceeb Bangkok, ces lawv pw nyob ntawm tej ntug kev thiab hauv qab choj. Kev txwv thiab kaw lawv tus kheej nyob hauv tsev, yog ib lub luag hauj lwm uas ua tiav ntawm cov tseem hwv xwb. Tab sis kev txwv thiab kev kaw ntawd ua rau kev nrhiav noj ntawm cov yim neeg pluag coob leej tuag tshaib thiab rov tua lawv tus kheej. Cov neeg Thaib poob hauj lwm coob nyob Thaib teb uas yog ib lub teb chaws muaj kev lag luam loj tim 2 nyob As Xias toob fab naj.

Kev txwv thiab kaw lawv tus kheej nyob hauv tuam ceeb Bangkok thiab lwm cov xeev nyob ib puag ncig thiab nyob qab teb zaum 2, mas txwv tsis pub tawm yav hmo ntuj nyob hauv lub tuam ceeb Bangkok li 2 lub lis piam. Ua teeb meem rau cov tsev muag zaub mov noj thiab lwm cov kiab khw loj kawg, ces 2-3 lub lis piam tom ntej no lawv yuav nrhiav tsis tau nyiaj. Cov tuam khw loj xws li BigC, Lotus, Central thiab cov khw Seven 11, mas lawv yeej yuav hla dhau txoj kev kub ntxhov no. Txawm li cas kuj xij, pom tias tus kab mob COVID-19 yog ib qho teeb meem kub ntxhov loj kawg rau tsoom pej xeem Thaib.