KEV SIB KOOM SIAB KOOM NTSWS NTAWM LUB KOOM TXOOS KAV TOS LIV NYOB THAIB TEB

Kev yuav sib koom siab koom ntsws ua ib tug kom tau txhawb nqa cov neeg pluag txom nyem, mas yog lo lus teb ntawm lub Koom Txoos nyob Thaib teb thiab haum rau lub caij tus kab mob COVID-19 sib kis no.

Tam sim no Thaib teb tus kab mob heev zuj zus thiab kev tiv thaiv kuj yog nyuab kawg, ua rau niaj hnub muaj neeg kis mob coob heev. Lub 4 hlis muaj 30,000 tus neeg mob thiab lub 7 hli no cov neeg mob coob txog 526,828 leej lawm. Ua rau tsoom pej xeem poob siab thiab ntshai heev, cov neeg ua hauj lwm nyob hauv tej tuam tsev tsim toob xib poob hauj lwm thiab kev ncig tsham teb chaws kuj poob qis.

Tej lub caij muaj kab mob zoo li no, mas lub Koom Txoos nyob Thaib teb tau txiav txim siab pab cov neeg pluag txom nyem.

Txiv Plig Ong Art nyob zos Khej Me uas yog ib lub zos Hmoob loj tshaj hais tias : “Peb yuav nrhiav kev pab cov neeg pluag txom nyem, cov neeg laus thiab cov me nyuam yaus. Vim lawv yog cov tsis muaj kev khwv nyiaj txiag”. Qhov no yog kev paub uas tau nrog cov neeg hauv zej zog nyob ua ke thiab sib tham, ces lub Koom Txoos thiaj yuav tau sib koom tes nyob thoob teb chaws kom tau pab daws tsoom pej xeem kev kub ntxhov.

Lub Koom Haum tus cawm seej tau qhib lub tsev khuv leej kom tau nkaug tshuaj Vaccine rau cov uas tsis muaj feem cuam mus nkaug tshuaj raws tseem hwv txoj cai nyob hauv cov tsev kawm ntawv thiab cov tsev teev Ntuj. Lawv npaj txhiam xws noj mus faib rau cov neeg tsis muaj hauj lwm ua nyob hauv nroog. Qhov no yog kev sib tuav xam ntawm lub Koom Txoos chiv kev “Care & Share food for All”.

Cov tuam khw loj nyob Thaib teb kuj muab lawv tej txhiam xws noj uas yuav tag sij hawm coj mus faib rau cov neeg pluag txom nyem tau noj. Lub Koom Haum Oblates of Mary Immaculate (OMI), tau npaj txhiam xws noj mus faib rau cov tsev teev Ntuj thiab cov yim neej pluag nyob hauv lub xeev Phetchabun.

Txiv Plig Udomsak uas nws saib lub tsev teev Ntuj nyob Phetchabun hais tias : “Cov neeg pluag thiab raug teeb meem tab tom muaj coob zuj zus nyob hauv lub nroog nws nyob. Tsis hais cov neeg ntseeg thiab cov teev hawm Phus Thas ntau pua yim raug kev kub ntxhov loj kawg. Vim li ntawd, lub Koom Txoos yuav tau nyob ze cov neeg pluag txom nyem thiab raug kev kub ntxhov”.

Txiv Plig Dominico tau nrog cov tswv zos nyob ib cheeb tsam hauv lub nroog Lomsak sib tham, thiab thov kom cov tswv zos sau cov yim neeg uas raug kev kub ntxhov loj nyob hauv lawv tej zej zog tawm los, thiab Txiv Plig tau nqa txhiam xws noj mus faib rau 80 tsev neeg nyob hauv ntau lub zos.