TSUAS MUAJ TIB LUB MOO ZOO XWB

Vaj Qhia Fas Ntshis Kus rov qhia kev ntseeg raws cov lus hauv Leej Ntshiab Paj Lug tsab ntawv sau rau cov ntseeg hauv Nkas Las Tias tias “Yog hais txog lub Moo Zoo thiab cov Hauv Paus Xa Lus tej hauj lwm mas pom tias Paj Lug yog ib tug kub siab ua txoj hauj lwm no heev kawg nkaus. Paj Lug muab tas nrho nws txoj sia los ua txoj hauj lwm no.”

Vaj Qhia cim xeeb txog Paj Lug kev chim siab thiab tu siab thaum nws pom cov ntseeg hauv Nkas Las Tias yuam kev.

Paj Lug sau nyob hauv nws tsab ntawv tias lub Moo Zoo muaj 4 yam xws li: Leej Pleev tuag txhiv peb hauv kev txhaum, Leej Pleev raug zwm av, Leej Pleev sawv rov los, thiab Leej Pleev yees tawm tuaj rau cov thwj tim pom.

“Lub Moo Zoo no tshwm sim tuaj raws li Huab Tais Tswv Ntuj tau cog lus tseg cia tias yuav pub txoj kev cawm rau ntiaj teb neeg.”

Cov ntseeg hauv Nkas Las Tias poob rau qhov txaus ntshai tsam lawv tso lub Moo Zoo tseg, vim lawv ntseeg cov neeg dag kom lawv txhob tau kev twj lij nyob hauv txoj kev ntseeg. Cov neeg dag no lawv muab lub Moo Zoo los hnav kom tau ntxias cov neeg ntseeg rov tig mus coj Txoj Cai qub raws li Mais Xes tau teev cia.

Txawm li cas los, Paj Lug hais tias tsuas muaj Leej Pleev lub Moo Zoo xwb thiaj yog lub Moo Zoo tseeb tiag. Li ntawd, peb cov ntseeg tiam no thiaj nkag siab tau tias ua cas Paj Lug thiaj siv cov lus hnyav lus ntxhib los ntuas kom lawv nyob deb cov neeg tuaj haub ntxias lawv.

Tus Hauv Paus Xa Lus Paj Lug paub zoo tias lub Moo Zoo nws coj tuag cuag cov ntseeg hauv Nkas Las Tias yog lub Moo Zoo tseeb tiag vim yog Huab Tais Yes Xus lub Moo Zoo.

Paj Lug pom txog cov ntseeg lub siab ua xyem xyav, pom txog tej xwv txheej yuav tuaj nphav cov neeg ntseeg.

Vaj Qhia ntuas tias nyob hauv peb los tej zaud kuj tab tom ntsib xwv txheej li cov ntseeg hauv Nkas Las Tias, peb yuav daws cov saw hlau khi peb txoj kev ntseeg kom peb tau kev twj lij, kom peb nkag siab txog tib neeg qhov tseeb thiab nkag siab txog Huab Tais Yes Xus cov lus qhia thiab nkag siab txog Leej Txiv txoj kev nyiam.

Vaj Qhia hais tias Paj Lug cov lus no yuav muaj txiaj ntsim rau cov ntseeg hauv Nkas Las Tias thiab rau peb sawv daws tib si.