THOV KOM PEB TXOJ KEV KHAUB ZIG YES XUS LOJ HLOB MUS LI

Ua ntej yuav coj tsoom ntseeg thov Ntuj raws kab ke Tus Tshiab Xa Xov hauv Hnub Chiv hauv Lis Piam 19 Caij Nyob Nruab Xyoos, Vaj Qhia Fas Ntshis Kus nthuav txog cov lus hauv Ntawv Moo Zoo tias Huab Tais Yes Xus hais rau tsoom sid tias nws yog cov mov pub txoj sia, tsuas muaj Huab Tais Yes Xus tib tug xwb thiaj yug peb ntsuj plig txoj sia tau thiab tsuas muaj Huab Tais Yes Xus tib tug xwb thiaj yuav pub txoj sia nyob mus li rau peb tau.

Zam Ntawv Moo Zoo piav tias thaum Huab Tais Yes Xus ua kom cov ncuav mov ntsu tuaj rau tsoom sid noj tsau thiab Huab Tais Yes Xus hais txog cov mov Mas Nas thaum ub Huab Tais Ntuj tso los yug cov His Xas Lais hauv teb chaws suab puam tas, Huab Tais Yes Xus tau hais rau lawv tias nws yog cov mov muaj txoj sia nqes saum ntuj los, leej twg noj Huab Tais Yes Xus mas tus ntawd yuav ciaj nyob mus li. (Z 6: 51) Vaj Qhia hais tias cov lus no qhia kom peb to taub tias tsuas muaj Huab Tais Yes Xus tib tug xwb thiaj yuav yug peb txoj sia hauv sab ntsuj plig tau, tsuas muaj Huab Tais Yes Xus tib tug xwb thiaj daws peb cov txhaum tau, tsuas muaj Huab Tais Yes Xus tib tug xwb thiaj nrog nraim peb mus rau qhov txhia chaw, tsuas muaj Huab Tais Yes Xus tib tug xwb thiaj ntxiv zog thiab tsim kev thaj yeeb rau peb lub siab tau, thiab tsuas muaj Huab Tais Yes Xus tib tug xwb thiaj pub txoj sia nyob mus li rau peb tau tom qab peb tso lub ntiaj teb no tseg.

Peb pom tias cov mov puj txoj sia yog tus duab tsom txog Huab Tais Yes Xus qhov zoo nkauj, thiab yam tsom txog Huab Tais Yes Xus teej qav teej num hauv ntiaj teb no yog nyob hauv pluas mov hauv Hmo Hla. Huab Tais Yes Xus tsis yog pub mov rau tsoom neeg xwb, Huab Tais Yes Xus tseem muab tag nrho nws txoj sia, nws cev nqaij thiab cov ntshav los pub ntiaj teb neeg kom xwv ntiaj teb neeg thiaj tau txoj sia tshiab.

Cov lus no pab deev cov ntseeg lub siab kom kub siab mus txais Cim Yug, vim Huab Tais Tswv Ntuj tau txia ua cov mov yug neeg txoj sia.

Ntawv Moo Zoo sau ntxiv tias tsoom neeg raws Huab Tais Yes Xus qab ntawd, lawv yws yws Huab Tais Yes Xus tias ua cas tus Yes Xus lawv paub, lawv ib txwm pom thaum me me los ho yuav hais tias nws yog cov mov pub txoj sia tau.

Vaj Qhia ntuas tias kev ua xyem xyav li no mas qee lub caij kuj muaj nyob hauv peb lub tswv yim vim peb xav tau tus Huab Tais nyob saum ntuj, tsis yog tus Huab Tais nyob hauv peb tes hauj lwm.

Yog li no Vaj Qhia thiaj kom sawv daws ras tias Huab Tais Tswv Ntuj nqes los xeeb ua tib neeg kom thiaj paub txog tib neeg qhov tseeb, kom tau muaj feem nyob hauv tib neeg txoj sia, kom tau koom nyob hauv tib neeg. Li ntawd, tib neeg thiaj yuav tsis hu nrhiav tus Tswv Ntuj nyob deb ntawm lawv li yav tas los lawm, vim Huab Tais Yes Xus twb coj Tswv Ntuj los nyob ze tib neeg lawm.

Vaj Qhia txhawb nqa cov ntseeg kom caw Huab Tais Yes Xus tus pub txoj sia nyob mus li los nyob hauv lawv tsev thiab thov koom hmoov ntawm Huab Tais Yes Xus thaum lawv yuav noj ib pluas mov ua ke tias “Huab Tais Yes Xus thov koj nqes los nyob hauv rooj qav no, kom peb txhua tus tau noj pluas mov no tau koj txoj kev nyiam los yug peb.”

Kawg no Vaj Qhia kom cov ntseeg sawv daws tsa muag ntsia niam Mab Liab thiab vam txog niam Mab Liab pab kom sawv daws txoj kev khaub zig Huab Tais Yes Xus loj hlub zuj zus mus lawm tom ntej.