PEB UA NEEJ NYOB HAUV TXOJ CAI QUB LOS YOG PEB UA NEEJ XWS LI TSWV NTUJ COV ME NYUAM?

Nyob hauv Hnub Plaub hauv Lis Piam no Vaj Qhia Fas Ntshis Kus hais kom sawv daws rov nug yus tias puas yog kuv ua neej nyob hauv Txoj Cai Qub los kuv puas nkag siab tias Tswv Ntuj hu kuv los ua nws me nyuam, kom kuv ua neej nyob hauv txoj kev nyiam.

Hnub tim 18 lub 8 hli 2021 no, Vaj Qhia Fas Ntshis Kus piav txog cov lus nyob hauv Paj Lug tsab ntawv sau mus ntuas cov ntseeg hauv Nkos Lis Nthos. Paj Lug nkag siab txog cov ntseeg txoj kab xwm ua raws Txoj Cai Qub.

“Leej Ntshiab Paj Lug qhia tias vim txoj kev ntseeg txog Leej Pleev, mas lawv thiaj tsis khi nrog Txoj Cai Qub ntxiv lawm. Tiam sis, lawv raug hu los ua lub neej nyob hauv lub Moo Zoo kev twj lij.” Vaj Qhia nthuav cov lus ntxiv tias tus neeg txais txoj kev ntseeg mas nws tau hloov dua tshiab nyob hauv txoj kev cawm tas ntiaj teb neeg lub keeb kwm thiab hauv nws tus kheej. Txoj kev ntseeg lub plawv yog Huab Tais Yes Xus txoj kev tuag thiab sawv rov qab los.

Yog vim li no, nyob hauv cov ntseeg txoj sia mas thiaj yuav muaj ib lub caij ua ntej lawv tsis tau ua neeg ntseeeg thiab ib lub caij tom qab lawv txais kev ntseeg.

Ua ntej tus neeg tsis tau ntseeg txog Yes Xus, mas nws nyob hauv qab Txoj Cai Qub, nws yuav xav tias nws raug Txoj Cai Qub muab nws xauv cia cuag li nws ua neej nyob hauv kev txhaum.

Txoj Cai Qub ua rau peb ras txog kev hla txoj cai thiab ua rau peb ras txog peb cov txhaum.

Txoj Cai Qub txoj kab xwm yog ‘txwv’ tab sis kuj ‘txuag’ thiab ‘txhawb’ cov haiv neeg His Xas Lais thiab. Txoj Cai Qub qhia lawv, nplawm lawv, thiab hwj lawv sawv hauv lawv txoj kev tsis muaj zog.

Vim li no mas Vaj Qhia thiaj hais tias Txoj Cai Qub muaj qab hau nyob hauv ib lub caij xwb xws li tus me nyuam yog thaum nws hlob tiav niam tiav txiv, mas nws tsis yuav niam txiv los tu nws lawm. Tib yam nkaus li cov neeg ntseeg, yog thaum nws muaj txoj kev ntseeg lawm, Txoj Cai Qub kuj yuav dhau mus thiab Txoj Cai Tshiab yuav sawv tam Txoj Cai Qub chaw.

Txawm li ntawd, los Txoj Cai Qub kuj yuav tsis ploj thiab txawm muaj qab hau nrog Txoj Cai Tshiab. Tab sis yuav muab Txoj Cai Qub cov kab xwm los tshuaj xwm kom zoo kom xwv txhob phua lub ntsiab yuam kev thiab coj mus siv tsis raug.

Li ntawd, thiaj tsim nyog peb yuav rov nug peb tias kuv puas tseem nyob hauv lub caij yuav siv Txoj Cai Qub los tswj kuv, los kuv nyob rau lub caij txais lub txiaj ntsim ua Tswv Ntuj cov me nyuam lawm, ces kuv yuav ua neej nyob hauv kev sis nyiam sis hlub.