Cov Leej Phauj Kav Tos Liv thov ntuj rau As Kas Nis Taas teb

Tom qab cov Taliban txeeb tau lub nroog Khas Npus, mas cov Leej Phauj kuj tseem nyob nyab xeeb thiab. Tus thawj coj lub Koom Haum saib xyuas tej tub me nyuam nyob hauv Khas Npus thov kom tsoom pej xeem sawv daws sib pab thov ntuj rau cov neeg ntseeg nyob Khas Npus, kom sawv daws txhob raug kev ploj tuag.

Thiab thov kom cov neeg pluag txom nyem tau ntsib lub neej yav tom ntej nyob kaj siab lug sai sai.

For the Children Of Kabul yog lub Koom Haum kev ntseeg ntawm Is Tas Lias thiab lwm cov teb chaws. Lub Koom Haum tau qhib ib lub tsev tos txais cov me nyuam tsis puv 100 nyob hauv tuam ceeb Khas Npus, lawv ntiav ib co poj niam As Kas Nis Taas ua cov saib xyuas thiab ua xib hwb qhia ntawv rau cov me nyuam. Cov Leej Phauj tau pab kev kawm rau cov me nyuam thiab pab kom cov poj niam As Kas Nis Taas tau kawm ntawv thiab nrhiav tej yam hauj lwm rau cov yim neeg uas nyob ib puag ncig tau ua.

Lub lis piam tag los cov Taliban txeeb ntau lub nroog nyob As Kas Nis Taas teb, yog tom qab As Mes Lis Kas cov tub rog thim rov qab tas.

Hnub tim 15 lub 8 hli no, cov Taliban thiaj txeeb lub nroog Khas Npus thiab txeeb tau tus Txoov Tim Tswv As Kas Nis Taas lub theej kiab. Taliban ceeb toom tias kev sib ntaus rog tiaj tus thiab tsis muaj kev sib ntaus sib tua ntxiv.

Muaj 2 tug Leej Phauj Yes Xus Is tuaj ntawm Is Ntias teb tuaj nrog rau 4 tug ntxhais tab tom kawm ua Leej Phauj, lawv ua hauj lwm hauv lub Koom Haum tshaj Ntuj Lus pab neeg, lawv puav leej nyob hauv lub nroog Khas Npus.

Cov neeg ntseeg yog ib co tsawg tsawg nyob hauv ib lub teb chaws Islam uas yog As Kis Nis Taas teb, uas cov neeg As Kas Nis Taas tuaj yeem ntiab tawm teb chaws tau txhua lub sij hawm. Tsis tas li ntawd, cov neeg ntseeg kuj yooj yim raug kev iab hiam thiab kev tuag tau los ntawm kev ntseeg. Tsuas muaj tib lub tsev teev Ntuj xwb, uas nyob hauv tus tiam lis Is Tas Lias lub loog nyob Khas Npus. Tab sis cov ua thawj yog cov ntseeg uas yog neeg As Kas Nis Taas. Xyoo 2018, nyob As Kas Nis Taas teb tsuas muaj 200 tus neeg ntseeg xwb, thiab feem coob yog cov neeg txawv teb chaws uas tuaj mus ua hauj lwm nyob hauv tus tiam lis Is Tas Lias lub tsev.