THAIB TEB QHIB TEB CHAWS RAU LUB 11 HLIS NO

Hnub tim 1 lub 11 hlis no, cov tseem hwv Thaib npaj qhib teb chaws rau cov neeg ncig tsham teb chaws uas nkaug Vaccine txwm 2 koob nyob txhua txhua lub teb chaws. Cov tseem hwv Thaib hais tias ; xav ua kom kev lag luam nyob hauv lub teb chaws rov zoo tuaj.

Ua ntej tus kab mob COVID-19 tsis tau tshwm sim, mas Thaib teb nqus cov neeg ncig tsham teb chaws 1 xyoo no yog 40 plhom leej. Cov neeg ncig tsham teb chaws feem coob yog tuaj mus saib dej hiav txwv thiab ncig cov tsev haus dej haus cawv hmo ntuj. Muab xam los mas cov nyiaj tau los ntawm kev ncig tsham teb chaws yog 20 feem pua ntawm cov nyiaj tau nyob hauv lub teb chaws.

Vim kev txwv txais neeg txawv teb chaws nyob hauv lub caij tus kab mob COVID-19 sib kis, ua rau kev lag luam poob qis thiab yog ib txoj kev piam sij loj kawg nyob hauv 20 xyoo dhau los. Yog tias tus neeg txawv teb chaws twg raug soj ntsuam tsis muaj kab mob, mas nws tuaj yeem ncig tsham Thaib teb xws li cov neeg Thaib.

Kev qhib qhov rooj txais tos cov neeg txawv teb chaws ntawm Thaib teb, mas yog txais cov teb chaws uas tsoom pej xeem nkaug tshuaj Vaccine li ntawm 70 feem pua. Tam sim no tsoom pej xeem Thaib cov uas nkaug Vaccine ib koob tsuas muaj 48 feem pua xwb, hos cov nkaug Vaccine 2 koob lawm yog 30 feem pua.

Yav tag los lub ceeb Bangkok yog qhov nto npe thiab nrov hais txog kev lom zem yav hmo ntuj, tab sis nyem no raug kaw thiab tsis pub haus dej haus cawv nyob hauv tej tsev lom zem hmo ntuj.

Tsaib no Thaib teb poob peev nyiaj txiag ntawm kev ncig tsham teb chaws li ntawm 50,000 plhom US dos las. Vim cov neeg ncig tsham teb chaws tsawg lawm 83 feem pua. 2 xyoos tag los lawm, muaj cov neeg ncig tsham teb chaws nyob Thaib teb li ntawm 40 plhom leej, tab sis nyem no tshuav li ntawm 6 plhom leej lawm xwb.