TSA VAJ QHIA ZAM PAJ LUG 1 UA TIM KHAWV NTSHIAB

Monday, November 08, 2021

Vaj Qhia Fas Ntshis Kus tso lus kheev kom muaj cai tshaj tawm tsa Vaj Qhia Zam Paj Lug Ib ua tim khawv Ntshiab. Tam sim no muaj lus tshaj tawm thiab foom hmoov zoo tias : “Vaj Qhia tus ua ntsej muag luag ntxhi”

Vaj Qhia Zam Paj Lug Ib tuag hnub tim 28 lub 9 hlis xyoo 1978. Tom qab nws ua Vaj Qhia tau 33 hnub xwb. Vaj Qhia Zam Paj Lug Ib tau ua lub Rooj Ncauj Lus Vas Tis Kas 2 cov hauj lwm ntau kawg. Ua ntej nws yuav raug tsa ua Vaj Qhia, mas nws nyiam ua neeg me thiab hais txog kev pluag hauv fab ntsuj plig. Nws kub siab lug qhia kev ntseeg. Hnub tim 13 lub 10 hli tag los, Vaj Qhia Fas Ntshis Kus thiaj tsa Vaj Qhia Zam Paj Lug Ib ua tim khawv Ntshiab nrog rau 6 tug tim khawv uas yav tom ntej yuav ua Leej Ntshiab.

Vaj Qhia Zam Paj Lug Ib yuav raug tsa ua tim khawv ntshiab nyob Vas Tis Kas uas yog Vaj Qhia Fas Ntshis Kus ua tus tsa. Qhov hwj huam uas Vaj Qhia Zam Paj Lug Ib ua, yog xyoo 2011 nws tau kho ib tug me nyuam ntxhais nyob hauv lub Cheeb Koom Txoos Npuas Nos Ais Lis teb chaws As Zees Tis Nas. Uas yog kho tus me nyuam ntxhais muaj mob hauv nws lub paj hlwb thiab yog tus kab mob yuav ua rau lub paj hlwb puas. Tsaib ub Vaj Qhia Fas Ntshis Kus tau tsim ib lub Koom Haum Vas Tis Kas, kom tau txhawb nqa lub tswv yim thiab qhia kev ntseeg ntawm Vaj Qhia Zam Paj Lug Ib. Xyoo 2008, yog xyoo txwm 30 xyoo ntawm Vaj Qhia Zam Paj Lug Ib tuag. Ces Vaj Qhia Npes Nes Dis tim 16 rov xav txog Paj Lug tsab ntawv uas nws tau sau mus rau cov ntseeg nyob Fis Lis Pos. Paj Lug sau tias : “Txhob ua tej yam muab hlob thiab ntshaw nyiaj, txhob ua txuj ua neeg me kom lwm tus qhuas” Vaj Qhia Npes Nes Dis hais tias : cov lus nyob hauv Ntawv Ntshiab ua kom nco txog Zam Paj Lug Ib, tus uas tau ua zoo nyob hauv cov Tswv Qhia ib yam li Leej Ntshiab Tsas Npos Los Mes Os.