TXIV PLIG LEGANI NYUAM QHUAV NRHIAV POM LUB TSEV TEEV NTUJ TA OM

Raug tso pov tseg nyob hauv hav liaj lub caij ua tsov rog thiab tsis muaj cov neeg ntseeg li lawm. Tab sis hnub no rov hloov ua qhov chaw tshaj Ntuj Lus dua ib zaug ntxiv, nyob hauv lub xeev Battambang. Pab tub tshaj Ntuj Lus PIME hais tias :

“Peb yuav txuag cov qhov phom nyob ntawm phab ntsa cia, vim yog lub cim zeem tseeb txog tsoom pej xeem txoj kev txom nyem”.

Ib lub tsev teev Ntuj uas raug tso tseg los tau ntau xyoo, tom qab ntsuj rog cheb ntxuav cov neeg ntseeg. 2-3 xyoos tag los muaj ib tug Txiv Plig rov mus nrhiav pom lub tsev teev Ntuj ntawd nyob hauv cov hav liaj fab fab, tam sim no lub tsev teev Ntuj ntawd rov muaj sia tuaj lawm. Nod yog ib zaj piav txog lub tsev teev Ntuj Ta Om uas nyob Khas Phus Chas qaum teb.

Txiv Plig Legnani yog ib tug Txiv Plig nyob hauv thawj pab tub tshaj Ntuj Lus uas tuaj txog Khas Phus Chas teb xyoo 1990, tom qab tsov rog Pol Pot. Xyoo 2019 Txiv Plig tau ua hauj lwm nyob hauv lub xeev Battambang uas nyob Khas Phus Chas qaum teb. PIME hais tias lawv nrhiav pom lub tsev teev Ntuj ntawd li ntawm 20 xyoo lawm. Lawv to taub txhua yam ntawm lub tsev teev Ntuj, tab sis tsis muaj kev tsheb mus txog. Tsuas yog dej thiaj ntws mus txog xwb. Lawv taug cov ntswg liaj mus, ces lawv thiaj pom lub tsev teev Ntuj uas muaj neeg muab siv los ua nkuaj nees lawm xwb.

Lub tsev teev Ntuj Ta Om txhim tsa nyob hauv xyoo 1910. Peb ntsia pom lub tsev tus yam ntxwv, mas yog lub Koom Haum tshaj Ntuj Lus Tranjare nyob Paris ua tus txhim. Xyoo 1938 muaj cov neeg ntseeg 700 leej. Xyoo 1970 yog lub caij ua tsov rog ces cov tub rog As Mes Lis Kas thiaj tso hoob pob tua cov pej xeem Nyab Laj nyob thaj tsam ntawd. Lawv yog ib co pej xeem Nyab Laj koom tes nrog tseem hwv nyob Hanoi uas khiav mus nyob Khas Phus Chas teb. Yog vim li ntawd peb thiaj yuav txuag cov qhov phom qhov hoob pob raug nyob ntawm tej phab ntsa, ua lub cim qhia txog kev raug txom nyem.