LEEJ NTSHIAB YOS XES YOG TUS QAUV HAIS TXOG TIB NEEG KEV SIB RAUG ZOO YAM MUAJ NUJ NQIS

Vaj Qhia Fas Ntshis Kus rov qab qhia cov ntsiab lus hais txog Leej Ntshiab Yos Xes rau sawv daws mloog nyob hauv hnub tim 24 lub 11 hlis xyoo 2021 no tias tus neeg seem hauv xeeb ceem thiab sawv daws xav tsis txog, los nws yeej muaj lub luag hauj lwm tseem ceeb nyob hauv Tswv Ntuj txoj hau kev cawm neeg.

Vaj Qhia xaiv cov lus los hais txog Leej Ntshiab Yos Xes mas kuj yog rov xav txog nws lub luag hauj lwm nyob hauv txoj kev cawm neeg li keeb kwm.

Vaj Qhia tsom ntsoov txog cov lus hauv Lus Kas Ntawv Moo Zoo thiab Mas Tais Ntawv Moo Zoo hais txog Yes Xus caj ces tias tuaj ntawm Has Nplas Has los As Das thiab los xaus rau Yos Xes thiab Yes Xus.

Lus Kas thiab Mas Tais sau tias Yos Xes tsis yog Yes Xus txiv raws roj ntsha tab sis Yos Xes yog Yes Xus txiv yam tsis muaj ib qho xyeej. Vim li ntawd, Yes Xus thiaj ua kom Tswv Ntuj cov lus cog tseg nrog tib neeg tiav nyob hauv Yes Xus.

Mas Tais cov lus qhia kom paub tias Yos Xes yog tus tam qhov nruab nrab hauv Tswv Ntuj hau kev cawm ntiaj teb neeg.

Yos Xes yog tus neeg txawj ceev tus kheej, ua dab tsi los nws tsis ua kom ncha, nws ua lub neej raws li Tswv Ntuj kom nws ua.

Vaj Qhia hais tias Leej Ntshiab Yos Xes nyiam nyob ntsiag to tsis rau leej twg pom, tab sis peb sawv daws yuav pom Leej Ntshiab Yos Xes tau nyob hauv lub caij txom nyem.

Yog li Leej Ntshiab Yos Xes thiaj qhia kom peb ras tias txhua tus nyob zais ntshis nram lwm tus nraub qaum lawv muaj cai nyob hauv kev cawm neeg li keeb kwm.

“Ntiaj teb xav tau cov txiv neej thiab poj niam ntawd.” Vaj Qhia hais li.

Lus Kas sau piav tias Yos Xes yog tus saib xyuas Yes Xus thiab Mab Liab.

Yos Xes lub luag hauj lwm no thiaj ua rau nws yog ‘tus saib xyuas lub Koom TXoos’ thiab. Tswv Ntuj pub kom Leej Ntshiab Yos Xes yog lo lus teb Kas Es lo lus nug Tswv Ntuj thaum nws muab As Npes tua tas tias: Kuv puas yog tus zov rawv kuv tus kwv?

Leej Ntshiab Yos Xes lub neej qhia kom paub tias ib txwm los peb raug hu los saib xyuas peb cov kwv tij nkauj muam, saib xyuas cov neeg nyob ze ze peb, saib xyuas cov neeg Tswv Ntuj pub kom lawv nkag los rau hauv peb txoj siab.

Vaj Qhia hais tias zoo li Leej Ntshiab Yos Xes tab tom pub ib txoj kev coj neeg sib raug zoo rau peb taug nyob hauv lub xeeb ceem ntxhov quav nyos no.

Kawg no Vaj Qhia Fas Ntshis Kus muab ib co lus cev rau Leej Ntshiab Yos Xes los qhia sawv daws hais, cov lus no yog pab rau tus neeg tab tom tawm tsam txoj kev kho siab, cov lus no yuav pab tus neeg hais kom nws tau ntsib kwv luag, phooj ywg, thiab tus nres nws.

Cov lus cev rau Leej Ntshiab Yos Xes yog li no:

“Leej Ntshiab Yos Xes,

koj yog tus saib xyuas Mab Liab thiab Yes Xus,

thov koj pab peb kom txawj tu kev sib raug zoo nyob hauv peb lub neej.

Txhob pub leej twg poob rau hauv kev raug tso pov tseg nyob ua ntsuag.

Thov peb rov raug zoo nrog peb lub keeb,

nrog cov tau tso ntiaj teb tseg,

thiab thov peb paub peb qhov phem qhov tsis zoo, cov lus dab lus tsov.

Koj pab peb kom txawj ua ib tug phooj ywg zoo rau tus raug xwv txheej,

xws li koj tau nres Mab Liab thiab Yes Xus nyob hauv lub caij txom nyem,

thov koj nres peb nyob hauv peb txoj kev.

Ua li.”