CEEV FAJ THIAB TEEV NTUJ TSIS TSEG

Nyob hauv Hnub Chiv thawj lis piam hauv lub caij Tos Huab Tais, Vaj Qhia Fas Ntshis Kus nqua hu sawv daws kom ‘ceev faj’ thiab nquag ‘teev Ntuj’ mas thiaj yuav ‘tsa’ tau tus plig kom sawv hauv kev tsaug zog thiab pab peb kom tsom ntsoov qhov tseem ceeb hauv peb txoj sia.

Ntawv Moo Zoo hauv Hnub Chiv lis piam 1 caij Tos Huab Tais hais txog lub caij Huab Tais tuaj yog zaum kawg, mas Vaj Qhia hais tias peb raug hu los muaj kev vam khom nyob hauv lub caij Huab Tais tuaj cawm peb thiab ‘peb xyiv fab tos Huab Tais’, txawm tias peb tab tom nyob hauv nruab nrab txoj kev ntxias thiab kev txom nyem. Huab Tais caw peb los sawv thiab tsa taub hau vim txoj kev cawm nyob ze peb lawm.

Vaj Qhia ntuas tias niaj hnub hauv peb txoj sia mas kev ntxias thiab kev txom nyem looj koov peb tsis tseg, peb yuav nquag nco ntsoov Huab Tais Yes Xus lo lus hais kom peb zov hmo, ceev faj thiab teev Ntuj tsis tseg.

Kev ceev faj yog ib tug yawm sij tseem ceeb hauv cov ntseeg txoj sia, yog kom peb ras thiab txav deb yam ntxias peb kom ua xyem xyav. Kev ceev faj yog kom peb kho lub siab kom txhob ua neeg tub nkeeg los yog ua tus neeg ntseeg tsua lo tsis muaj zog sab ntsuj plig thiab tsis nquag teev Ntuj. Kev ceev faj yog txhob cia peb lub neej tsuas yog ib txog kab ke niaj hnub ua, los yog poob hauv kev ntxhov siab.

Vaj Qhia Fas Ntshis Kus qhia peb kom txhob poob hauv lub neej ua ib tug neeg tub nqeeg thiab kom peb tus nplig txhob mag rooj ntxiab ntes nplig mas peb yuav tsum ntsia lub nra peb ris cov neeg nyob ib puag ncig thiab rov nug tus kheej tias peb puas ras txog lub nra ntawd thiab peb ua dab tsi rau lub nra ntawd.

Kev teev Ntuj yog qhov yuav pab kom peb muaj kev ceev faj, kev teev Ntuj pab kom lub teeb tsom kev hauv peb lub siab cig tsis txawj kug, kev teev Ntuj coj peb rov los nrhiav Tswv Ntuj, kev teev Ntuj tsa tus nplig kom sawv thiab tsom ntsoov qhov tseem ceeb hauv txoj sia. Yog li peb yuav tsis ntxuam kev teev Ntuj ib zaug li.

Nyob hauv lub caij Tos Huab Tais no mas Vaj Qhia xav muab ib lo lus teev Ntuj luv luv los qhia rau cov ntseeg qog thiab coj mus xyaum teev Ntuj yog lo tias “Los mas, Huab Tais Yes Xus.”