Cov tsev kawm ntawv kaw, cov Txiv Plig nyob Thaib teb qhib qhia kev ntseeg

Lub caij muaj tus kab mob COVID-19 sib kis nyob Thaib teb, mas cov tseem hwv tau muab cov tsev kawm ntawv kaw tas. Cov Txiv Plig nyob pem toj siab hauv lub nroog Maecheam, xeev Chiangmai tau qhib tsev qhia kev ntseeg rau cov me nyuam yaus, vim tshuav cov me nyuam uas tsis tau txais lub Cim Yug thawj zaug coob leej heev. Txiv Plig Michai Udomdej hais tias : “Vim li ntawd kuv thiaj npaj qhia kev ntseeg rau cov me nyuam kawm ntawv txhua tag kis”.

Txiv Plig Michai Udomdej yog tus Txiv Plig saib lub tsev teev Ntuj Church of the Virgin Mary nyob hauv lub zos Av Dawb, nroog Maecheam, xeev Chiangmai uas nyob nrug deb ntawm tuam ceeb Bangkok li 800 km.

Txij lub 8 hli los txog lub 10 hli xyoo no, mas cov tsev kawm ntawv txhua lub raug kaw tas. Ces Txiv Plig thiaj npaj qhia kev ntseeg rau cov me nyuam kawm ntawv nyob hauv lub tsev kawm ntawv Leej Ntshiab Yos Xes, kom lawv tau txais lub Cim Yug thawj zaug. Txiv Plig hais tias : cov me nyuam kawm ntawv lawv zoo siab heev, niaj hnub 6 teev sawv ntxov xwb lawv twb tuaj hauv tsev teev Ntuj lawm, kom tau kawm kev ntseeg. Tab sis lub tsev teev Ntuj yog nyob pem roob siab, ces yog lub caij ntuj nag kev mus los tsis tshua yooj yim.

Txiv Plig yog tus saib lub tsev teev Ntuj hauv zej zog thiab lub tsev kawm ntawv Leej Ntshiab Yos Xes uas muaj cov Leej Phauj Saint. Paul de Chartres yog cov txais cov me nyuam toj siab tuaj nyob kawm ntawv nyob hauv. Cov me nyuam kawm ntawv ib txhia pw nyob hauv tsev kawm ntawv, hos cov nyob ib ncig tsis deb tsis ze, mas lawv rov mus pw lawv vaj lawv tsev.

Ces hnub kawg hauv lub 10 hli ntuj uas yog hnub tim 31, thiaj muaj 106 tus me nyuam kawm ntawv tau txais lub Cim Yug yog thawj zaug.