NYOB HAUV CAIJ TOS HUAB TAIS, PEB YUAV UA DAB TSI RAU YES XUS THIAB LWM TUS

Caij Tos Huab Tais, lis piam 3 Vaj Qhia hais tias caij Tos Huab Tais mas peb yuav rov nug peb tias kuv yuav npaj dab tsi tseg cia txais Yes Xus yug thiab kuv yuav ua dab tsi rau Yes Xus thiab lwm tus.

Tim 12 lub 12 hlis no yog Hnub Chiv tim 3 hauv caij Tos Huab Tais, muaj tsoom ntseeg nrog lawv tsev neeg tuaj tos mloog Vaj Qhia cov lus ntuas hauv lub tshav puam hwm Leej Ntshiab Pob Zeb ntau hauj sim tsis hais cov neeg Aws Los Pas, cov ntseeg tuaj nram As Mes Lis Kas Naj tuaj thiab cov tub lis dej num hauv Caritas.

Ntawv Moo Zoo hnub no piav txog thaum Zam Ntxuav Plig ntuas tsoom sid kom hloov siab tshiab tos tus yuav tuaj. Zam ntuas tias ‘tus muaj ob lub tsho yuav faib rau tus tsis muaj. Tus muaj mov noj, nws kuj yuav faib rau tus tsis muaj. Nej tsis txhob kom luag them se tshaj txoj cai txiav, nej txhob quab yuam leej twg, txhob ntxias yuav dab tsi. Nej nyiaj hli raug npaum li cas, mas nej yuav txaus siab txais li ntawd.’ Zam cov lus no kuj yog hais kom peb rov nug peb tias ntawm peb ntiag tug ne peb yuav ua dab tsi thiaj tsim nyog tos txais tus Huab Tais yuav tuaj.

Vaj Qhia hais tias yam peb tsim nyog ua mas yog ras ntsoov tias txoj sia yog txoj kab xwm tsis yog lub sij hawm, txoj sia yog paj tshab Tswv Ntuj muab rau peb. Vaj Qhia hais li no kuj yog kom peb rov soj ntsuam peb tus kheej thiab ua hauj lwm kom hnyav mas txoj kev npau suav hauv txoj sia thiaj muaj tseeb tau vim sawv daws nyias muaj nyias ib txoj kab xwm yuav tsum ua kom tiav. Tsis tas li ntawd, peb yuav tsis ntshai nug Huab Tais Ntuj tias “Kuv yuav ua dab tsi rau Tswv Ntuj tau, thiab kuv yuav ua dab tsi pub rau kuv cov kwv tij nkauj muam tau?”

Yog vim qhov no mas caij Tos Huab Tais thiaj yog lub caij rau peb tso txhua yam tseg thiab rov nug peb dua tias kuv yuav npaj dab tsi tseg cia tos Yes Xus yug los, qhov ntawd yog ua rau Yes Xus thiab lwm tus.

Vaj Qhia xaus cov lus tias peb sawv daws yuav xav kom pom tias yam twg yog yam peb yuav ua tau tsis hais loj los me; piv txwv li tawm rooj mus saib xyuas cov neeg raug tso ua ntsuag nos, pab cov laus los sis cov raug mob, tsob hwb cov neeg txom nyem los cov neeg pluag, rov zam txim rau tus kheej, them nuj nqes rau tus neeg peb tshuav ntawm nws, nrog yus tus yeeb ncuab sib tham kom haum, los sis thov Ntuj kom ntau dua qub.

Peb sawv daws nrhiav ua yam hauj lwm ntsej hnov muag pom li hais los no nyob hauv caij Tos Huab Tais no mog!