PEB PAB THIAB PUB KEV XYIV FAB RAU LWM TUS NYOB HAUV CAIJ YES XUS YUG

Nyob hauv Hnub Chiv 4 caij Tos Huab Tais tas los no, Vaj Qhia Fas Ntshis Kus piav tias Mab Liab sawv kev mus xyuas thiab pab tus phauj Es Lis Xas Npes qhia peb tias peb muaj peev xwm tseb kev tshua thiab faib Yes Xus kev xyiv fab rau lwm tus tau xws li Mab Liab ua rau Es Lis Xas Npes.

Nyob hauv hnub tim 19 lub 12 hlis tas los no, Vaj Qhia Fas Ntshis Kus ntuas cov ntseeg hauv lub tshav puam hwm Leej Ntshiab Pob Zeb kom lawv sawv thiab tawm mus nyob hauv lub caij Yes Xus Yug no. Ntawv Moo Zoo hauv hnub no yog ntu tias Mab Liab mus xyuas Es Lis Xas Npes thaum paub tias Es Lis Xas Npes tab tom xeeb me nyuam. Mab Liab uas raws lub suab nrov hauv nws siab kom nws mus nyob ze tus phauj thiab pab tus phauj.

Vaj Qhia nthuav txog 2 lo lus hauv zaj no yog lo tias ‘kom muaj raws’ thiab lo tias ‘maj zeeg’. Lo tias ‘kom muaj raws’ tsom kom peb pom tias Mab Liab muaj lub tswv yim xav mus lawm tom ntej thiab nws yuav tsis poob rau tej kev ntxhov siab tias nws yuav xeeb tub thaum nws tsis tau yuav txiv ces tej zaud nws yuav raug txim raws txoj cai los yog nws yuav ntsib kev txom nyem.

Vaj Qhia hais tias tej yam txaus ntshai no tsis muaj cuab kav yeej Mab Liab lub tswv yim thiab kev tso siab rau Tswv Ntuj tau. Mab Liab muab tej kev ntxhov siab no tso pov tseg, nws tawm mus xyuas thiab pab tus phauj Es Lis Xas Npes tab tom xeeb tub thaum hnub nyoog laus lawm.

Vaj Qhia ntuas sawv daws tias nyob hauv peb los peb yuav ua tiag tawm kom dhau tej xwv txheej, kev xav rov qab txo peb tus kheej, thiab peb yuav cev tes mus pab lwm tus xws li Mab Liab tau ua tus piv txwv rau peb nyob hauv hnub no. Peb yuav mus xyuas cov neeg laus, cov nyob ib leeg, hu nrog lawv sib tham, los sis ua cov hauj lwm tsim koob hmoov lwm yam.

Huab Tais Tswv Ntuj yog tus loj tas nrho thiab pab peb tsis tseg, yog li peb yuav cev tes mus rau Tswv Ntuj.

Lo lus tim ob yog lo tias ‘maj zeeg’, mas Vaj Qhia hais tias yog kom peb ua neej nyob hauv kev xyiv fab txhua hnub, ua siab loj ntsia pem hauv ntej, txawm tias yuav muaj kev haub ntxias ntau yam los xij. Mab Liab kauj ruam raws nraim cov neeg muaj Tswv Ntuj nyob puv hauv siab thiab txoj sia, muaj kev xyiv fab tus piv txwv. Yog li ntawd, peb yuav rov nug peb tias peb kauj ruam ne yog mus zoo li cas, peb puas yuav rhais ruam lawm tom ntej nyob hauv kev vam khom, kev muaj zog thiab kev ua tiag nyiaj txeem. Yog peb tso tus kheej rau kev tu siab los looj koov tas txwv, mas peb yuav coj Tswv Ntuj mus rau lwm tus tsis tau.

Cov lus no yog Vaj Qhia xav kom sawv daws tsuas nrhiav lub tswv yim xav qhov zoo rau tus kheej, txawm tias niaj hnub peb yuav muaj teeb meem tsis tseg, thiab kuj yog kom peb sawv daws cog ib tug cuj pwm rov luag ntxhi rau tus kheej.

Cov hauj lwm tsim koob hmoov yam peb yuav ua tau yam ua ntej tshaj plaws yog ‘ua lub ntsej muag luag ntxhwb ntxhi’ vim peb muaj kev xyiv fab nyob hauv Huab Tais Yes Xus xws li Mab Liab thiab Es Lis Xas Npes.

Kawg no, Vaj Qhia kom sawv daws cev lus rau Mab Liab kom nws pab peb maj zeeg sawv kev mus hauv lub caij Yes Xus Yug no.