TXUAG LUB YIM NEEJ CIA

Nyob hauv hnub hwm Yim Neeg Ntshiab hauv Nas Xas Les xyoo no, Vaj Qhia Fas Ntshis Kus kom sawv daws xav txog lub yim neej thiab niaj hnub ras tias peb yog ib tsev neeg.

Vaj Qhia Fas Ntshis Kus nthuav txog Tswv Ntuj txoj hauj lwm xaiv yim neeg nyiam ua neeg me thiab coj lub neej pluag hauv Nas Xas Les los nyob nruab nrab hauv peb sawv daws tias muaj 2 fab tsom rau cov yim neeg.

Fab ua thawj yog tsom txog lub Moo Zoo yog tus cag nawm kev ua neej. Ntawv Moo Zoo piav txog thaum Mab Liab thiab Yos Xes nrhiav tus me nyuam Yes Xus tau peb hnub thiaj pom Yes Xus nrog cov thoob xwm ntawv nyob hauv lub Tuam Tsev Teev Ntuj. Yam xwm no tsom kom pom tias Yes Xus hlob nyob hauv yim neeg txhawj xeeb txog nws thiab Yes Xus hlob nyob hauv nws niam thiab nws txiv txoj kev hlub.

Vaj Qhia hais tias hnub no peb yog leej twg, peb yog tus tuaj ntawm txoj kev hlub tuaj, tsis yog los ntawm yam peb muaj, los yam teeb meem tshwm sim nyob hauv peb yim neeg los. Peb yuav xyiv fab lees txais yam peb yog, lee peb tus cag thiab lub hauv paus.

Fab tim ob yog kom peb qhib siab qhib tswv yim dav fo nyob hauv txhua hnub los kawm kom paub txog kev ua ib yim neeg, vim tias txhua txhua hnub muaj ib lub caij thiab ib lub sij hawm tshiab rau peb. Vaj Qhia xav kom sawv daws kawm ntawm Yim Neeg Ntshiab tias muaj tej lub caij lawv kuj ntsib teeb meem, ntsib kev ntxhov siab thiab kev nyuaj siab yam tsis tau xav txog.

Dua li ntawd, Ntawv Moo Zoo hais ntxiv tias Mab Liab thiab Yos Xes pom Yes Xus nrog cov thoob xwm ntawv nyob ua ke hauv lub Tuam Tsev Teev Ntuj. Yes Xus hais rau nws niam nws txiv tias nws yuav leg nws txiv cov hauj lwm. Lo lus no ua rau nkawd xav tsis thoob. Vaj Qhia hais tias zaj no qhia kom peb ua ib tus neeg txawj mloog lwm tus, sib tuav tes mus ua ke, thiab sib koom daws cov teeb meem peb niaj hnub ntsib. Cov xwv txheej peb niaj hnub ntsib mas peb yuav muab lub tswv yim zoo, ua qhov yooj yim thiab muab siab rau daws. Yog peb ua li no mas peb thiaj yuav tsis muaj lus nyob hauv yim neeg.

Vaj Qhia hais ntxiv tias niaj hnub no peb pom tias nyias saib nyias tus kheej loj dua lwm tus, yus tsuas hnov yus lub suab xwb. Piv txwv li tus ua txiv tsev nws muab lub siab dai duam rau nws lub xov tooj, tus yog niam los kuj dais duam rau nws lub, me nyuam los kuj ua li niam thiab txiv, lawv tsis tig ntsej los sib tham. Qhov no yog qhov Vaj Qhia tu siab kawg.

Yog li mas Vaj Qhia thiaj xav kom sawv daws ‘tsim kev thaj yeeb’ ua ntej yuav nkag mus pw. Yog tsev neeg twg tsis tsim kev thaj yeeb mas tej zaud yuav muaj kev sib cov nyom tau. Qhov kawg yuav muaj kev siv dag siv zog thiab ua tej yam txhaum cai rau hauv lub cuab ces yim neeg ntawd yuav tawg.

Vim li no, Vaj Qhia thiaj xav kom sawv daws txo lub tswv yim yus saib yus loj dua lwm tus, sawv daws yuav hloov lub tswv yim los saib lwm tus yog tus tseem ceeb, thiab sib sau los thov Ntuj tseb kev thaj yeeb thiab txuag nkawd yim neeg.