KEV THOV NTUJ QHIB TAU PEB LUB SIAB MUS CUAG TSWV NTUJ

Hnub Chiv tim 9 lub 1 hlis xyoo 2022, Vaj Qhia Fas Ntshis Kus ntuas tsoom sid hauv lub tshav puam hwm Leej Ntshiab Pob Zeb kom lawv thim xav txog qhov tseem ceeb hauv kev thov Ntuj thiab nco txog hnub lawv tau txais Cim Ntxuav.

Ntawv Moo Zoo hauv hnub YES XUS TXAIS LUB CIM NTXUAV xyoo no hais txog thaum Yes Xus tuaj ua kab ke ntxuav ntawm tus dej Yos Las Das. Qhov no yog lub hauv paus pib Yes Xus lub neej tawm tuaj rau zeej tsoom pom. Yes Xus tsis ua hwj huam thiab tsis sawv los qhia tsoom sid, tab sis Yes Xus nrog cov neeg txhaum ua ib ke mus txais kab ke ntxuav ntawm Zam. Vaj Qhia nthuav yam xwm no tias yog Huab Tais Yes Xus nqes los nyob hauv peb sawv daws thiab raus hauv dej kom tau ntxuav sawv daws.

Ntawv Moo Zoo qhia rau peb paub tias thaum Yes Xus txais kab ke ntxuav, nws thov Ntuj. Vaj Qhia hais tias Huab Tais Yes Xus puas yog tab tom thov Ntuj zoo li peb thov. Yog kawg, Huab Tais Yes Xus thov Ntuj zoo li peb ntag thiab Huab Tais Yes Xus nyiam thov Ntuj tsis tseg. Huab Tais Yes Xus cov lus thov Ntuj yog cov lus sib tham muaj txoj sia, yog cov lus khaub zig Leej Txiv.

Vaj Qhia hais ntxiv tias Ntawv Moo Zoo hnub no peb pom tau 2 yam: Huab Tais Yes Xus tuaj nrhiav peb nyob ntawm tus dej Yos Las Das, thiab Huab Tais Yes Xus muab siab rau thov Leej Txiv.

Qhov no yog ib co lus zoo rau peb kawm, peb sawv daws poob rau hauv cov teeb meem tuaj raug peb txoj sia thiab cov teeb meem no rub kom peb tog mus tob zuj zus. Li ntawd, peb yuav thov Ntuj kom rub peb tawm hauv cov teeb meem no. Kev thov Ntuj tsis yog txoj kev coj peb khiav deb tej teeb meem, kev thov Ntuj yog kom Tswv Ntuj ua hauj lwm nyob hauv peb. Kev thov Ntuj pab kom peb koom ua ib tug nrog Tswv Ntuj thiab coj peb mus cuag Tswv Ntuj.

Vaj Qhia hais tias “Kev thov Ntuj yog tus yawm sij qhib peb siab rau Tswv Ntuj. Kev thov Ntuj yog peb rov txuas pa rau txoj sia. Kev thov Ntuj pab kom peb tau hnov Leej Txiv lub suab hu peb ua nws tus me nyuam xws li hnub Huab Tais Yes Xus tau hnov nyob ntawm tus dej Yos Las Das.”