LUB CIM CAV TXOG TSWV NTUJ KEV HLUB

Hnub tim 16 lub 1 hlis xyoo 2022 no, Vaj Qhia Fas Ntshis Kus nthuav txog Yes Xus thawj lub cim tias yog qhov qhia kom peb paub txog Tswv Ntuj kev hlub yog nyob ze peb, muaj lub siab muag siab mos, thiab hlub tshua lwm tus.

Ntawv Moo Zoo hauv Hnub Chiv, lis piam 2 caij Nyob Nruab Xyoos yog zaj hais txog Yes Xus mus koom rooj tshoob nyob Kas Nas, Yes Xus ua kom cov dej txia ua cawv. Vaj Qhia nthuav tias lub cim Huab Tais Yes Xus tau ua no pab kom cov thwj tim ntseeg txog nws. Lub cim hauv hnub no thiaj yog lub cim qhia txog Tswv Ntuj kev hlub.

Huab Tais Yes Xus lub cim ua kom cov dej txia ua cawv no tsis yog xav qhia peb txog Huab Tais Yes Xus lub hwj huam, tab sis yog qhia peb txog Huab Tais Yes Xus kev hlub cov neeg tuaj koom rooj tshoob. Vaj Qhia xav kom sawv daws paub tias Tswv Ntuj kev hlub nyob ze, muag mos, thiab hlub tshua.

Huab Tais Yes Xus ceev faj ua kom dej txia ua cawv thiab pab kom rooj tshoob xaus yam lom zem xauv npo. Vaj Qhia hais tias Yes Xus niam yog tus mus hais ntsiag ntsiag rau Yes Xus tias cawv tas lawm. Huab Tais Yes Xus tsis xav kom rooj tshoob muaj teeb meem, Huab Tais Yes Xus thiaj hais kom cov tub ce cawv hliv dej rau hauv cov hub, ces cov dej ntawd txia ua cov cawv qab. Qhov no peb pom tau tias Tswv Ntuj ua hauj lwm ze ze peb thiab ua ntsiag ntsiag.

Huab Tais Yes Xus thawj lub cim tsis yog nws ua hwj huam los kho cov neeg mob, tiam sis yog Huab Tais Yes Xus ua raws neeg lo lus thov.

Vaj Qhia ntuas tias “Tswv Ntuj ua hauj lwm zoo li hais los no. Yog peb ua xws li niam Mab Liab tau ua nyob hauv rooj tshoob no, hais rau Huab Tais Yes Xus, ces Huab Tais Yes Xus yuav pab peb. Yog peb muab siab rau nrhiav Huab Tais Yes Xus lub ‘cim’ nyob hauv peb lub neej, peb yuav zwm rau Tswv Ntuj kev hlub thiab txia ua Huab Tais Yes Xus thwj tim.”

Ntawv Moo Zoo hais ntxiv tias cov cawv txia ntawm dej los no yog cov cawv qab, txhais tias Huab Tais Tswv Ntuj yuav pub yam zoo tshaj rau tus neeg thov txog Tswv Ntuj. Yam ntawd yog kev xyiv fab mus li.

Vaj Qhia xav kom sawv daws rov mus nrhiav Tswv Ntuj lub cim nyob hauv sawv daws saib Tswv Ntuj tau ua dab tsi thiab pub dab tsi nyob hauv lub caij peb poob hauv kev txom nyem. Tsim nyog peb yuav muab siab rau nrhiav lub cim cav txog Tswv Ntuj kev hlub, ces peb yuav muaj kev zoo siab xyiv fab nyob hauv peb txoj sia.