LEEJ NTSHIAB YOS XES TSOM TXOG TSWV NTUJ KEV HLUB MOS NYOOS

Vaj Qhia hais txog Leej Ntshiab Yos Xes txoj kab xwm ua ib leej txi yog tus duab tsom txog Tswv Ntuj txoj kev hlub mos nyoos ua kom peb nyiam thiab zoo siab rau peb lub zog me.

Hnub tim 20 lub 1 hlis 2022 no, Vaj Qhia rov nthuav txog Leej Ntshiab Yos Xes lub neej rau cov ntseeg nyob hauv chav tsev Paj Lug 6 tias Leej Ntshiab Yos Xes yog tus leej txi muaj siab mos. Txawm tias Ntawv Moo Zoo tsis piav txog Leej Ntshiab Yos Xes ntau, tab sis peb paub tias Leej Ntshiab Yos Xes yog tus qauv ua ‘neeg ncaj’ rau Huab Tais Yes Xus yoog thiab Leej Ntshiab Yos Xes lub siab mos mas peb pom tau nyob hauv Huab Tais Yes Xus kev khuv leej neeg.

Peb hnov Ntawv Moo Zoo hais tias Huab Tais Yes Xus nyiam siv lo lus ‘Txiv’ yog thaum nws tham txog Tswv Ntuj thiab Tswv Ntuj kev hlub neeg, xws li nyob hauv zaj paj lug tus tub loj leeb.

Nyob hauv zaj no peb pom tias tus neeg ua txiv muaj lub siab zam txim rau nws tus tub mus li, leej txiv tsis muab txim rau tus tub loj leeb, leej txiv puag tus tub nyob hauv kev hlub.

Vaj Qhia ntuas tias “Lub siab mos loj dua ntiaj teb kev txiav. Lub siab mos yog txoj kev mus nrhiav qhov ncaj. Yam no yog lub laj thawj qhia tias Tswv Ntuj tsis ntshai peb cov txhaum, peb kev yuam kev; yam Tswv Ntuj ntshai mas yog peb lub siab kaw tuag nthi rau Tswv Ntuj kev hlub.”

Vaj Qhia hais ntxiv tias Tswv Ntuj kev hlub nyob hauv kev ua siab mos, thiab thawj tus neeg qhia kom Huab Tais Yes Xus muaj tus yam ntxwv siab mos yog nws txiv, Yos Xes.

Vaj Qhia xav kom peb rov tig los nug peb tus kheej saib nyob hauv peb lub neej, peb puas tau ua tim khawv txog lub siab mos li hais. Thiab Vaj Qhia xav kom peb yoog raws Leej Ntshiab Yos Xes tus qauv, peb tso rau Tswv Ntuj kev hlub ua hauj lwm nyob hauv peb.

Tswv Ntuj vam txog peb rab peev xwm, tab sis peb lub zog me mas peb thiaj tau Ntuj lub txiaj ntsim thiab hlob nyob hauv txoj kev hlub.

Dab phem ntxias peb kom saib lub zog me yog qhov txhaum, peb yuav thuam peb lub zog me. Tiam sis Tswv Ntuj qhia rau peb paub tias Tswv Ntuj qhuas neeg lub zog me thiab Tswv Ntuj zam rau tus neeg paub tias nws lub zog tsis loj, nws yuav vam txog Tswv Ntuj kev khuv leej.