TSWV NTUJ LO LUS HLOOV PEB

Vaj Qhia Fas Ntshis Kus cov lus hauv Lis Piam 3 caij Nyob Nruab Xyoos yog ntuas kom cov neeg ntseeg sawv daws nyeem Ntawv Moo Zoo txhua hnub, mas cov neeg ntseeg thiaj yuav tau lo lus nplij siab thiab yuav hloov siab tshiab nyob hauv Tswv Ntuj kev xyiv fab.

Ntawv Moo Zoo hauv hnub no piav txog thaum Huab Tais Yes Xus sawv mus nyeem cov kauj ntawv hauv lub tsev Txoos hauv Nas Xas Les. Huab Tais Yes Xus nyeem cov lus hauv tus yaj saub His Xais kauj ntawv hais txog Tswv Ntuj yuav cawm cov pluag thiab txom nyem. Thaum nyeem tas, Huab Tais Yes Xus hais rau sawv daws tias “Hnub no, cov lus nyob hauv zaj Ntawv no tsheej xeeb raws li nej tau hnov.” (LK 4: 21)

Vaj Qhia hais tias Huab Tais Yes Xus lo lus ‘hnub no’ yog hais txog txhua hnub hauv tiam tas los, ziag no thiab txhua tiam lawm yav tom ntej.

Vaj Qhia nthuav cov lus hauv Ntawv Moo Zoo hnub no tias Huab Tais Yes Xus lo lus ntxim lawv siab thiab lawv paub tias muaj qee yam tob dua no, tab sis lawv lub tswv yim thiab lawv kev ntxub ntxaug looj lawv ua rau lawv tsis to taub. Tsuas muaj ib yam lawv zeem tseeb tau yog Tswv Ntuj lub Tswv Yim pleev Huab Tais Yes Xus thaum nthuav cov lus no.

Vaj Qhia nthuav qhov lus no tias thaum cov Leej Choj nthuav Tswv Ntuj Lo Lus, lawv yuav tsis hais cov lus chwv tus neeg twg tus ntsuj plig los txoj sia vim cov Leej Choj vam txog Leej Ntuj Plig los pleev lawv. Cov lus nthuav yuav tawm hauv Tswv Ntuj lub Tswv Yim los thiab yog yam nyob hauv hnub no li Ntawv Moo Zoo piav txog.

Dhau ntawm nthuav Ntawv Moo Zoo lawm, Vaj Qhia hais kom sawv daws thov Ntuj rau cov neeg ua txoj hauj lwm tshaj lub Moo Zoo, kom Leej Ntuj Plig nyob txawm hauv lawv mas Tswv Ntuj Lo Lus thiaj muaj txoj sia, yog cov lus nplij neeg thiab hloov neeg tau nyob hauv txhua hnub.

Yog muab hais los, mas Tswv Ntuj Lo Lus hloov txhua txhua hnub ua hnub Tswv Ntuj hais lus rau peb. Li ntawd, tsim nyog peb yuav nrhiav Ntawv Moo Zoo cia nyob ze peb tes, txhua hnub muab coj los nyeem mus mus los los ob peb lwm, muab siab rau mloog saib Tswv Ntuj Lo Lus ntawd hais dab tsi rau peb thiab nplij peb lub siab li cas.

“Tswv Ntuj Lo Lus yog lub teeb coj peb mus ua ke nyob hauv lub Koom Txoos. Peb ib tug muab siab rau mloog ib tug, peb kuj yuav muab siab rau mloog Tswv Ntuj Lo Lus thiab mloog Leej Ntuj Plig tshoj peb lub siab.” Vaj Qhia ntuas li.