TXAWJ MLOOG TSWV NTUJ LUB SUAB HU XWS LI LEEJ NTSHIAB YOS XES

Nyob hauv hnub tim 26 lub 1 hlis xyoo 2022 no, Vaj Qhia Fas Ntshis Kus rov nthuav txog Leej Ntshiab Yos Xes lub neej rau cov ntseeg mloog. Hnub no Vaj Qhia hais tias Leej Ntshiab Yos Xes npau suav thiab nws txawj mloog Tswv Ntuj lub suab hu nws hauv npau suav.

Nyob hauv Ntawv Ntshiab, pom tias thaum Tswv Ntuj yuav hais lus rau tus neeg twg, mas Tswv Ntuj yuav hais nyob hauv nws txoj npau suav. Npau suav thiaj yog lub cim hais txog neeg txoj sia hauv sab ntsuj plig, kev npau suav thiaj yog thaj tsam rau Tswv Ntuj tuaj ntsib tib neeg. Tsis tas li ntawd, nyob hauv thaj tsam no tseem muaj ntau lub suab rau peb hnov thiab, tshwj xeeb yog dab phem lub suab ntxias neeg kom ua xyem xyav. Li ntawd, thiaj tsim nyog peb yuav ua kev nkag siab txog Tswv Ntuj lub suab nrov ncha hauv lwm lub suab.

Vaj Qhia pib nthuav tias Yos Xes xav tsis thoob, nws ua xyem xyav rau qhov tias nyob nyob Mab Liab cia li xeeb tub rau hauv plab. Yog Xes tsaug zog ces Ntuj tus Tshiab tawm los rau Yos Xes pom hauv npau suav, hais kom Yos Xes coj Mab Liab los nrog nws nyob. Yos Xes hnov tus Tshiab hais li, mas nws ua raws tus Tshiab cov lus.

“Nyob hauv peb kev ua neej, muaj ntau zaus peb raug teeb meem, peb tsis nkag siab thiab nrhiav kev daws cov teeb meem tuaj npav peb tsis tau, mas peb yuav thov Ntuj pab. Yog peb thov Ntuj nyob hauv lub sij hawm ntawd, ces yog peb tab tom mloog Tswv Ntuj qhia yam tsim nyog rau peb ua.”

Yos Xes npau suav tias tus me nyuam yuav raug xwv txheej. Yos Xes mloog Tswv Ntuj lub suab, nws coj Mab Liab thiab tus me nyuam khiav mus rau Hais Nkws Tos teb.

Vaj Qhia ntuas tias thaum peb raug yam xwm phem, peb yuav thov Ntuj. Peb kev thov Ntuj yog mloog lub suab nplij peb lub siab kom ua siab loj xws li Yos Xes tau txais.

Thaum nyob Hais Nkws Tos teb, Yos Xes mloog ntsoov saib thaum twg Tswv Ntuj mam hais kom nws rov los Yus Das teb. Muaj ib hmo, Tswv Ntuj hais rau Yos Xes hauv npau suav tias Hes Los tuag lawm. Tswv Ntuj hais ib zaug ntxiv rau Yos Xes kom coj tus me nyuam los nyob Nas Xas Les vim ntshai tus vaj As Kes Los.

“Kev ntshai yog ib feem hauv neeg txoj sia, yog li peb thiaj yuav vam txog kev thov Ntuj. Yos Xes kuj ntshai tus vaj As Kes Los tsam muaj siab lim hiam xws li Hes Los, mas Tswv Ntuj thiaj coj Yos Xes kev mus rau Nas Xas Les, xeev Nkas Lis Lais. Kev thov Ntuj lub zog thiaj ua qhov pom kev nyob hauv qhov tsaus ntuj.”

Vaj Qhia tau thov Ntuj rau sawv daws hauv lub caij sawv daws tsis tshuav kev vam khom thiab kev thov Ntuj no. Vaj Qhia thov tias “Leej Ntshiab Yos Xes, thov koj pab qhib cov neeg ntawd lub siab kom lawv txawj nrog Tswv Ntuj sib txuas lus, mas lawv thiaj yuav pom qhov pom kev, lub zog loj, thiab kev pab ntawm Tswv Ntuj xws li koj.”