NYOB HAUV TSWV NTUJ, PEB TAU LUB SIJ HAWM TSHIAB TSIS TSEG

Vaj Qhia Fas Ntshis Kus ntuas cov neeg ntseeg kom txais Huab Tais Yes Xus los nyob hauv lawv, ces lawv yuav tsis ntshai nquam nkoj nyob hauv lub hiav txwv neeg txoj sia.

Hnub tim 6 lub 2 hlis 2022, Vaj Qhia Fas Ntshis Kus tau nthuav Ntawv Moo Zoo hais txog thaum Huab Tais Yes Xus hais kom Xis Moos Pob Zeb nquam nkoj mus tom qhov dej tob thiab pov lub vas puav ntses. Vaj Qhia hais tias Huab Tais Yes Xus nce mus saum Xis Moos Pob Zeb lub nkoj, yog mus ua dab tsi? qhia tsoom sid. Huab Tais Yes Xus xaiv lub nkoj tsis muaj ntses, yog lub nkoj tus tswv nkoj nyuam qhuav coj tom plawv dej ntuj los, nws sab thiab qaug zog vim puav tsis tau ntses.

Vaj Qhia hais tias lub nkoj yog peb txoj sia, txhua txhua hnub peb nquam peb lub nkoj mus hauv plawv dej ntuj, peb ua tiag puav ntses, caum peb kev npau suav, ua raws peb cov hauj lwm, nrhiav txoj kev sis nyiam. Tab sis ntau zaus, peb los tes dawb tes qhuav xws li Xis Moos Pob Zeb. Yam peb coj rov qab los yog txoj kev sab, kev qaug zog.

Lub nkoj qhuav puav tam li peb tsis muaj peev xwm, tab sis lub nkoj qhuav yog qhov chaw rau Huab Tais Yes Xus tshaj Lo Lus.

Tswv Ntuj nyiam ua li ntawd, Tswv Ntuj los nyob hauv peb thaum peb txoj sia tsis tshuav dab tsi cev rau Tswv Ntuj; Tswv Ntuj tshaj txog nws kev nplua nuj nyob hauv peb kev pluag, Tswv Ntuj tshaj txog nws kev khuv leej neeg nyob hauv peb kev txom nyem.

Yog peb zoo siab txais Tswv Ntuj, mas lub nkoj qub qub thiab khaub khaub hlab xwb los Tswv Ntuj yeej txaus siab lawm. Vaj Qhia nug sawv daws saib puas kam cia Tswv Ntuj nce hauv sawv daws lub nkoj, puas kam cia Tswv Ntuj los nyob hauv sawv daws lub neej, puas kam pub txoj sia rau Tswv Ntuj.

Tswv Ntuj tsis nyiam kom peb hais tias kuv yog neeg txhaum, thov koj txav deb kuv. Tswv Ntuj tsis nrhiav kev zoo txhij, Tswv Ntuj nrhiav kev nyob ze peb, Tswv Ntuj niaj hnub hais rau peb tias ‘koj puas kam cia kuv nce hauv koj lub nkoj nas?’

Yog vim li hais, Huab Tais Yes Xus thiaj cog ib lub siab tshiab rau Xis Moos Pob Zeb yog ‘tso siab’. Huab Tais Yes Xus nce mus hauv Xis Moos Pob Zeb lub nkoj thiab hais kom nws nquam nkoj tawm mus puav ntses. Xis Moos Pob Zeb ua raws vim nws tso siab rau Yes Xus.

Vaj Qhia ntuas tias yog peb txais Huab Tais Yes Xus los nce peb lub nkoj, ces peb yuav muaj cuab kav nquam nkoj tawm mus puav ntses tau xws li Xis Moos Pob Zeb.

“Yog vim Yes Xus coj peb kev, ces peb yuav tsis ntshai.”

Vaj Qhia txhawb cov ntseeg siab kom lawv txhob poob hauv txoj kev poob siab thaum lawv puav tsis tau dab tsi, txhob maj tsum txhob maj tseg.

“Peb pib dua tshiab tau. Huab Tais hu peb kom sawv los ua dua ntxiv, Huab Tais yuav tho hau kev rau peb. Li ntawd, thov peb sawv daws txais Yes Xus los nyob hauv peb, tso siab rau Yes Xus, thiab koom nrog Yes Xus tawm hauv daim av mus cuag lub plawv dej ntuj.