YES XUS COV THWJ TIM YOG COV PLUAG THIAB ZOO SIAB

Hnub Chiv tim 13 lub 2 hlis 2022, Vaj Qhia Fas Ntshis Kus nthuav txog cov neeg ntseeg tus yam ntxwv pab kom lawv tau txoj hmoov zoo, yog lawv ua neeg pluag.

Hnub Chiv lis piam 6 caij Nyob Nruab Xyoos, Ntawv Moo Zoo yog cov zaj hauv Lus Kas Ntawv Moo Zoo (LK 6: 20-23) hais txog cov tau txoj hmoov zoo.

Ntawv Moo Zoo hais tias Huab Tais Yes Xus nyob nruab nrab tsoom sid, nws tsis tau hais rau sawv daws, tab sis yog hais rau cov thwj tim txog cov muaj hmoov zoo.

Vaj Qhia nthuav tias Huab Tais Yes Xus tab tom qhia tias tus neeg muaj hmoov zoo yog tus neeg ua nws thwj tim. Cov tsis yog Yes Xus thwj tim, lawv yuav tsis to taub cov lus no, tab sis yog peb rov nug peb tias Yes Xus tus thwj tim yug tus neeg zoo li cas, peb yuav teb tias ‘yog tus muaj hmoov zoo.’

Vaj Qhia tsom txog lo lus tias “Tus tau koob hmoov yog tus neeg pluag, vim Ntuj lub Ceeb Tsheej yog nws tug.”

Huab Tais Yes Xus hais 2 yam qhia rau lawv: koob hmoov thiab pluag, lawv tau koob hmoov vim lawv ua neeg pluag.

Vaj Qhia Fas Ntshis Kus qhia tias tus neeg pluag yog cov neeg ntseeg uas pom kev xyiv fab nyob hauv cov paj tshab nws niaj hnub tau txais ntawm Tswv Ntuj- xws li hauv txoj sia, hauv yam Tswv Ntuj tsim, thiab hauv cov kwv tij nkauj muam- tsis yog nyob hauv nyiaj txiag los lub cuab tam.

Kev pluag no ntuas peb siab kom txawj pub yam peb muaj rau lwm tus. Raws li Tswv Ntuj xav mas yam peb muaj yog yam tsis muaj qab hau, tsis tseem ceeb. Li ntawd Huab Tais Yes Xus cov thwj tim thiaj yuav yog tus neeg tsis muab hlob, siab dav, tsis ntxuab ntxaug, thiab yuav ua tus neeg muag neeg mos.

Vaj Qhia xav kom sawv daws nkag siab yooj yim, Vaj Qhia thiaj hais txog Xis Moos tus yam ntxwv sawv daws tau hnov nyob hauv lis piam tas los. Xis Moos tso txhua yam tseg, nws raws Yes Xus mus.

“Xis Moos ua tus neeg me, nws tso txhua yam tseg, ces Xis Moos tau ua Yes Xus thwj tim. Tab sis tus neeg twg nws tsuas ntsia pom nws txoj kev xav xwb thiab nws ib rau nws tej cuab tam, nws yuav txiav siab raws Yes Xus qab tsis tau.”

Vaj Qhia hais tias muaj qee tus neeg nyiam mloog Huab Tais Yes Xus tab sis nws tsis kam txais Yes Xus cov lus, mas tus neeg ntawd tsis tau koob hmoov, nws hmoov tsis zoo thiab nws yuav poob hauv kev ntxhov siab.

Yog li, cov neeg pluag thiab ras tau tias nws pluag mas nws tau koob hmoov, nws muaj kev zoo siab.

Yes Xus cov thwj tim yuav paub nrhiav ib lo lus rov nug lawv tus kheej, lawv paub tias yuav nrhiav Tswv Ntuj tau li cas, mas lawv yuav paub txog kev nplua nuj.

Cov neeg ntseeg txaus siab rau lawv poob hauv txoj kev sim siab thiab txaus siab taug txoj kev khwv kom lawv nkag siab Tswv Ntuj.

Vaj Qhia xaus cov lus tias ‘kev xyiv fab’ yog lub cim tiag ntawm tus neeg ua Huab Tais Yes Xus thwj tim.

Vaj Qhia coj sawv daws thov niam Mab Liab pab sawv daws tias “Peb yuav thov niam Mab Liab, Yes Xus thawj tug thwj tim, thov koj pab peb ua ib tug thwj tim qhib siab dav thiab muaj kev xyiv fab.”