PEB YUAV ZOO XWS LI TSOOM LEEJ NTSHIAB YOG PEB TIG LOS YOOG RAWS LEEJ NTHIAB YOS XES

Hnub Plaub lub lis piam no Vaj Qhia Fas Ntshis Kus nthuav txog Leej Ntshiab Yos Xes lub neej rau sawv daws mloog ntxiv, hnub no Vaj Qhia hais tias Leej Ntshiab Yos Xes yog tus hlub tshua lwm tus neeg.

Tim 16 lub 2 hlis 2022 no, Vaj Qhia rov tuaj ntsib tsoom ntseeg hauv chav tsev Paj Lug 6 thiab nthuav Vaj Qhia Pis Os 9 cov lus cav txog Leej Ntshiab Yos Xes rau sawv daws mloog.

Vaj Qhia hais tias ua cas Vaj Qhia Pis Os 9 thiaj cav tias Leej Ntshiab Yos Xes yog tus pov hwm lub Koom Txoos.

Peb nrhiav lo lus teb tau nyob hauv Ntawv Moo Zoo. Thaum peb nyeem cov zaj hais txog Leej Ntshiab Yos Xes, peb yuav pom tias Leej Ntshiab Yos Xes coj tus me nyuam Yes Xus thiab niam Mab Liab mus ua raws li Tswv Ntuj tau hais kom nws ua. Leej Ntshiab Yos Xes ua yam nws tsim nyog ua kom tau txuag Yes Xus thiab Mab Liab txoj sia, thaiv nkawd hauv cov xwv txheej.

Vaj Qhia hais ntxiv tias nyob hauv Tswv Ntuj txoj kev npaj tseg cia, Leej Tub yuav nrog nraim Leej Niam, nkawd yuav tsis sib ncaim ib zaug li. Rooj Ncauj Lus Vas Tis Kas 2 kuj tau hais txhab ntxiv txog yam no tias ‘Yes Xus, Mab Liab, thiab Yos Xes yog Koom Txoos lub plawv. Piv tias Koom Txoos yog lub tsev mas Yes Xus, Mab Liab thiab Yos Xes yog tus ncej dab nyob nruab nrab hauv lub tsev.’

Vaj Qhia ntuas tias nyob ntawm peb, peb yuav rov nug peb tias peb puas tau siv tag nrho peb lub zog los tiv thaiv Yes Xus thiab Mab Liab xws li Leej Ntshiab Yos Xes.

Vim Leej Ntshiab Yos Xes tau txuag thiab tiv thaiv Yes Xus thiab Mab Liab thaum nws muaj txoj sia nyob, ziag no lub Koom Txoos yog Yes Xus lub cev, ces Leej Ntshiab Yos Xes thiaj yog tus pov hwm lub Koom Txoos.

Peb ua neej nyob hauv tiam neeg hais lus xyav thiab thuam lub Koom Txoos tias yog lub Koom Txoos lo txhaum, tab sis qhov tseeb tsis yog lub Koom Txoos lo txhaum, yog peb li txhaum xwb vim lub Koom Txoos yeej ib txwm nyob los ua ntej, tsuas yog neeg muaj txhaum ces neeg tau kev khuv leej ntawm Tswv Ntuj.

Li ntawd, Vaj Qhia thiaj kom cov ntseeg sawv daws sib pab cev lus rau Leej Ntshiab Yos Xes nyob hauv lub caij ntsib kev nyuaj kev txom nyem.

Vaj Qhia xaus cov lus hauv hnub no tias “yuav muaj puas tsawg tus Leej Ntshiab ua ib tug piv txwv zoo rau peb npaum Leej Ntshiab Yos Xes lawm.”