PAB PAWG NRHIAV CAI RAU TSOOM PEJ XEEM HAUV PAS KIS TAAS SAWV KHAJ CAI THOV KEV NCAJ NCEES COV NEEG TEEV HAWM

Nyob rau Pas Kis Taas teb, tsoom pej xeem sawv los nqua hu tseem hwv kom tseg kev ua phem rau cov neeg teev hawm uas yog ib pab pawg neeg tsawg.

Kev sawv los khaj cai zaum no yog muaj lub koom haum cov neeg ntseeg Ntuj ua tus coj, lawv ua ke mus nqua hu tseem hwv nyob hauv lub tsev xov xwm hauv Kas Las Tshis thaum hnub tim 6 lub 2 hlis tas los, vim muaj ib tug tub tshaj Ntuj Lus raug tua tuag nyob hauv lub zos Pes Has Vas.

Thaum hnub tim 30 lub 1 hlis, Xib Hwb Nas Ees thiab Xib Hwb Xis Las nkawd caij tsheb tawm hauv tsev teev Ntuj los txog ib tog kev, mas muaj 2 tus neeg siab phem caij tsheb nees hlau rho phom luas rau nkawd lub tsheb, raug Xib Hwb Xis Las tuag kiag hos Xib Hwb Nas Ees raug mob.

Cov neeg khaj cai xav kom zaum no tseem hwv ntes cov neeg txhaum los rau txim, vim yav dhau los cov neeg ua phem rau lwm txoj kev teev hawm tsis tau raug tseem hwv muab txim ib zaum li.