MUAB TSWV NTUJ LO LUS UA LEEM PHIAJ TAWM TSAM DAB PHEM COV LUS NTXIAS

Nyob hauv Hnub Chiv thawj lub lis piam hauv caij Plaub Caug, Vaj Qhia Fas Ntshis Kus ntuas cov ntseeg sawv daws kom ceev faj kev ntxias nyob hauv neeg txoj sia, thiab Vaj Qhia hais kom sawv daws yoog raws Huab Tais Yes Xus tus piv txwv tsis yeem ua raws dab phem cov lus hais.

Nyob hauv Vaj Qhia txoj kab xwm thov Ntuj hauv Hnub Chiv thawj lub lis piam hauv caij Plaub Caug xyoo no, Vaj Qhia Fas Ntshis Kus muab siab dai ncuv rau cov zaj hais txog Huab Tais Yes Xus yoo mov 40 hnub hauv teb chaws suab puam ces dab phem tuaj ntxias Huab Tais Yes Xus.

Vaj Qhia hais tias ‘teb chaws suab puam’ yog lub ‘cim’ tawm tsam dab phem kev ntxias neeg.

Vaj Qhia hais ntxiv tias Huab Tais Yes Xus kev tawm tsam hauv sab ntsuj plig zaum no yog yam zeem tseeb tias Huab Tais Yes Xus yuav ua tus Mes Xias zoo li cas.

Lus Kas Ntawv Moo Zoo piav tias dab phem hais ib co lus ntxias kom ntxim Huab Tais Yes Xus siab kawg nkaus. Dab hais tias “Koj yog Tswv Ntuj Leej Tub no, siv koj lub hwj huam raws koj siab ntshaw mas!”

Tab sis, Vaj Qhia nthuav tias dab cov lus no yog ntxias neeg kom poob hauv kev ua qhev; yog ua yus lub siab tus qhev.

Huab Tais Yes Xus tiv dab phem cov lus ntxias no tau, vim Huab Tais Yes Xus mloog Tswv Ntuj Lo Lus tias ‘txhob yuam Tswv Ntuj, lwm tus, los txhob siv lwm yam los ua kom xis rau yus txoj kev ntshaw, txhob muab yus lub hwj chim mus nrhiav qhov zoo rov rau yus.’

Vaj Qhia hais rau sawv daws tias “kev zoo siab thiab kev twj lij tsis yog vim yus tau ua huab tais ua tswv kav, tab sis kev zoo siab thiab twj lij yog vim yus tau pub rau lwm tus, tau nrog lawv ris tib lub nras, tau nyiam lawv, tau txo lub hwj chim kom qis los ua hauj lwm tsob hwb lwm tus.”

Vaj Qhia kuj ntuas sawv daws txog ‘kev ntxias’ hauv txoj sia tias “Kev ntxias siab yeej yuav tuaj nphav sawv daws, dab phem txoj kev ntxias no yuav tawm tuaj rau peb pom xws li yog yam zoo yog yam haum rau peb txoj kev ntseeg, yog li peb yuav ceev faj thiab txhob ntshai txais kev ntxias.

Peb pom tias Huab Tais Yes Xus tsis nrog dab phem sib txuas lus ntau. Li ntawd, peb yuav ua xws li Huab Tais Yes Xus tau ua piv txwv. Peb yuav tsis nrog peb lub siab lub tswv yim ntxias peb sib tham, peb txhob hais tias kuv ua kiag li lub siab hais mas vim sawv daws twb ua li ntawd tau ne.”

Hnub no Vaj Qhia xav kom cov ntseeg sawv daws ntsia Huab Tais Yes Xus ua tus piv txwv: Huab Tais Yes Xus tsis yeem rau cov lus ntxias, tsis xib rau txoj kev phem, muab Tswv Ntuj Lo Lus los ua cov lus teb tej lus ntxias siab. Huab Tais Yes Xus ua li mas nws thiaj yeej dab phem kev ntxias zaum no.

Vaj Qhia ntuas ua zaum kawg ua ntej yuav coj sawv daws koom siab thov Ntuj tias “thov kom lub caij Plaub Caug no yog lub caij peb nyob hauv teb chaws suab puam. Peb yuav nyob ntsiag to thiab thov Ntuj, peb yuav nres lub tswv yim thiab tig ntsia yam tuaj raug peb siab, peb yuav saib qhov tseeb nyob hauv peb, peb yuav muab Tswv Ntuj Lo Lus ua leem phiaj tawm tsam dab phem cov lus ntxias.”