TSWV NTUJ QHOV POM KEV TSA PEB KOM ROV XEEV DUA

Nyob hauv Hnub Chiv lub lis piam 2 caij Plaub Caug, Vaj Qhia Fas Ntshis Kus tau nthuav zaj cov Thwj Tim pom Huab Tais Yes Xus lub hwj huam tias yog ib zaj qhia peb tias peb yuav vam txog Tswv Ntuj qhov pom kev los kaj peb lub siab kom peb ntshaw thov Ntuj thiab tsob hwb lwm tus dua.

Vaj Qhia Fas Ntshis Kus rov tawm tuaj nthuav Ntawv Moo Zoo hauv Hnub Chiv rau tsoom ntseeg tuaj sib sau thov Ntuj raws li tus Tshiab xa xov, hnub no yog cov lus hauv Lus Kas Ntawv Moo Zoo (LK 9: 28-36) yog hais txog Huab Tais Yes Xus lub hwj chim tawm tuaj rau Pob Zeb, Zam thiab Yas Kos pom thaum Yes Xus mus teev Ntuj saum roob. Huab Tais Yes Xus lub ntsej muag hloov thiab nws cev ris tsho ci dawb paug ntsa iab. Mais Xes thiab Es Lias tawm los nrog Huab Tais Yes Xus tham. Vaj Qhia xav kom sawv daws ras txog nqe lus tias ‘Pob Zeb thiab nws cov npawg qaug dab ntub, tab sis lawv meej pem kawg, ces lawv pom Yes Xus lub hwj chim.’ (LK 9: 32)

Vaj Qhia pib ntuas tias cov thwj tim qaug dab ntub nyob hauv tej lub sij hawm zoo heev, xws li lawv tsaug zog thaum Huab Tais Yes Xus mus teev Ntuj yam ntxhov hnyo nyob hauv lub vaj Kes Ntxes Mas Nis. Vaj Qhia pom tias tej xwm no yog ib yam yuav xav tsis thoob.

Tab sis cov xwm hauv hnub no yog lawv qaug dab ntub ua ntej Huab Tais Yes Xus lub hwj chim yuav tawm tuaj, yog thaum Huab Tais Yes Xus teev Ntuj, thiab tej zaum peb tug thwj tim kuj koom nrog Huab Tais Yes Xus teev Ntuj mus txog lub caij lawv yoo dab ntub tsis tau mas lawv thiaj tsaug zog li ntawd. Yog tig rov los piv rau peb, mas peb kuj zoo li ntawd. Thaum peb xav kom peb faj seeb tab sis peb lub cev tsaug zog, xws li thaum peb teev Ntuj nyob hauv hnub peb lub cev khwv khwv mas zoo li peb tsis muaj zog, peb yuav ua tiag mas lub tswv yim thiaj xeev.

Vaj Qhia nthuav tias caij Plaub Caug yog lub caij zoo rau peb rov xeev dua tshiab, tab sis peb xwb mas peb yuav tsa peb kom rov xeev tsis tau, peb yuav tsum thov Tswv Ntuj pub lub txiaj ntsim rau peb. Peb yuav yeej lub cev kev qaug zog tau mas yog peb yuav vam txog Tswv Ntuj tswv yim lub zog pab. Vaj Qhia hais ntxiv tias yog peb pom tias tsis yooj yim, mas peb yuav thov Leej Ntuj Plig Ntshiab pab li no ‘Los Leej Ntuj Plig, los pab kuv, kuv xav pom Huab Tais Yes Xus, kuv xav hnov ntsoov thiab xav xeev mus li.’

Peb pom tias cov thwj tim lawv tsim hauv dab ntub tau mas yog vim lawv pom Huab Tais Yes Xus lub hwj huam. Li ntawd, peb kuj yuav vam txog Tswv Ntuj qhov pom kev los kaj peb kom peb pom txhua yam tau, Tswv Ntuj qhov pom kev deev peb, tsa peb, ntxiv kev vam thiab lub zog rau peb thov Ntuj, ntsia peb thiab muab ib lub sij hawm rau pab lwm tus.

Lub caij Plaub Caug no, peb yuav coj peb los nyob hauv Tswv Ntuj qhov pom kev thiab cia Huab Tais rov tsa peb lub siab kom xeev dua tuaj, tsis hais nyeem Ntawv Moo Zoo los yog ras txog Huab Tais Yes Xus raug ntsia saum Ntoo Cuam thiab ntsib Tswv Ntuj tus pheej xeeb peb, tus muaj hwj chim hloov peb tau, tus pub txoj sia tshiab rau peb, tus yog peb qhov pom kev.

Niam Mab Liab, thov koj pab kom peb txawj xeev thiab txawj qhib siab txais lub caij nyoog Tswv Ntuj pub txiaj ntsim rau peb no.