COV LAUS TXOJ SIA THIAB LUB NEEJ UA POV THAWJ TXOG KEV NTSEEG PAB PEB TSO SIAB

Hnub Plaub lub lis piam 4 caij Plaub Caug, Vaj Qhia Fas Ntshis Kus qhia Ntuj kev cai hais txog cov laus txoj sia thiab lawv lub neej ua pov thawj tias lawv muaj peev xwm pab kom peb muaj kev tso siab rau sab ntsuj plig thiab qhia kom peb pom Tswv Ntuj nyob nraim hauv peb lub neej.

Nyob hauv hnub tim 30 lub 3 hlis 2022 Vaj Qhia Fas Ntshis Kus tau muab zaj lus piav txog tus yawg laus Xis Mes Oos thiab tus pog laus As Nas hauv Ntawv Moo Zoo los ntuas sawv daws. Vaj Qhia hais tias nkawd lub neej qhia peb tias Tswv Ntuj hu cov laus los ua pov thawj txog lawv txoj kev ntseeg thiab tso siab rau Tswv Ntuj lo lus cog tseg zoo li cas, thiab lawv tau ua tus choj mus cuag cov neeg tiam tom ntej li cas.

Lub caij lub nyoog laug kom peb cev nqaij ntxhib tsis hnov kub los txias, tab sis Leej Ntuj Plig Ntshiab muaj peev xwm pab kom peb hnov tau hauv sab ntsuj plig.

Ntawv Moo Zoo hais tias nkawd tos ntsoov Tswv Ntuj tus cawm nqes los zoo li cas, thiab Leej Ntuj Plig Ntshiab tshoj Xis Mes Oos siab kom nws paub tias nws yuav tsis tuag yog nws tsis tau pom Tus Cawm Seej.

Nkawd muaj zog nyob hauv sab ntsuj plig, ces nkawd paub tias Huab Tais lub hwj chim nyob txawm hauv tus me nyuam Yes Xus.

Nkawd tos ntsoov mas nkawd lub tswv yim thiaj to taub Tswv Ntuj, thiab Leej Ntuj Plig Ntshiab qhib nkawd lub tswv yim kom kaj, txawm tias nkawd lub cev yuav ntaug mus raws caij nyoog lawm.

Vaj Qhia ntuas tias lub ntiaj teb vam txog cov laus xws li nkawd, yog cov laus uas paub thiab txais Leej Pleev los nyob hauv lawv.

Niaj hnub no lub sim ceeb tab tom tseb txoj kev zoo siab thiab daim duab cuav rau cov me nyuam yaus, ua rau cov me nyuam yaus ntsia tsis pom nyob hauv lawv sab ntsuj plig.

Peb cev nqaij yuav tsis hnov kub hnov txias tau, tab sis nyob hauv sab ntsuj plig mas peb txhob pub kom muaj tuaj zoo li ntawd, peb yuav xyaum peb lub neej sab ntsuj plig kom txawj tu siab, txawj hlub tshua, txawj mob siab rau, txawj ua siab muag mos, thiab txawj saib xyuas tus kheej thiab lwm tus.

Peb yuav tau txhim kho neeg lub haum xeeb kom neeg sab ntsuj pliag rov muag mos tsis ua siab txhav siab ntxhib ntxiv.

Xis Mes Oos thiab As Nas nkawd txoj sia thiab lub neej ua pov thawj kuj zoo xws li lwm tus laus neeg xib rau Leej Ntuj Plig nyob hauv Ntawv Ntshiab, lawv lub neej muaj peev xwm ua tus qauv rau peb yoog raws thiab qhia kom peb txawj ntsia kom pom Tswv Ntuj nyob nraim hauv peb lub neej.