Hnub Chiv Tim 1 Lub 5 Hlis 2022 (Sunday Homily)

Hnub Chiv Tim 1 Lub 5 Hlis 2022

Lub Caij Hla 3
Zam Ntawv Moo Zoo 21:1-19
“Pob Zeb, Zam tus tub, koj puas nyiam kuv? Koj zov kuv cov yaj mog. Koj raws kuv
mus.” Nyob zoo…
Kwv tij Hmoob sawv daws, Ntawv Moo Zoo hauv hnub no mas Yes Xus rov tawm los
rau cov thwj tim pom ib zaug dua los yog zaum tim peb lawm. Huab Tais Yes Xus
nrog cov thwj tim noj tshais. Huab Tais Yes Xus ua rau lawv paub tias nws muaj txoj
sia tshiab tiag tiag; nws tsis yog tus dab los tus ntsuj plig xwb. Qhov tiag yog tias nws
muaj qaij daim tawv, nws tshaib plab tau, nws noj tau, nws txaus plab tau. Nyem no,
peb paub me ntsis lawm txoj sia tshiab hauv Tswv Ntuj yog zoo li cas. Hauv zaj no
kuv thov coj kwv tij sawv daws xav tswv yim txog lo lus nug uas Huab Tais Yes Xus
nug Xis Moos Pob Zeb peb zaug tias “Koj puas nyiam kuv?” Pob Zeb teb rau nws tias
“Huab Tais koj paub tias kuv nyiam koj tiag.” Nws hais rau Pob Zeb tias yog koj
nyiam kuv, “Koj zov kuv cov yaj mog” thiab “koj raws kuv mus.” Huab Tais Yes Xus
muab cov hauj lwm rau Pob Zeb. Nws yuav ua tus thawj coj cov thwj tim thiab cov
neeg ntseeg. Thaum lawv coj Huab Tais Yes Xus mus rau Kais Fais, Pob Zeb twb tsis
lees Yes Xus peb zaug, ces nws tu siab kawg nkaus. Nyem no, Huab Tais Yes Xus
muab lub sij hawm rau nws ib zaug dua ua rau nws muaj cuab kav teb Huab Tais Yes
Xus tias “kuv nyiam koj tiag!” Lo lus nyiam hauv Ntawv Moo Zoo uas siv lus Greek
muaj ntau lo lus. Lo lus “agape” muaj lub ntsiab tias kev nyiam kev hlub uas tsis muaj
ciaj ciam los tsis muaj zwj ceeb los yog kev nyiam uas tsis xav dab tsis rov qab. Kev
nyiam ib yam li Tswv Ntuj nyiam tib neeg. Muaj ib lo lus hu tias “Phileo” muaj lub
ntsiab txog kev sib nyiam sib hlub hauv cov phooj ywg, los hauv yim neeg tsev neeg.
Huab Tais Yes Xus siv lo lus “agape” hais rau Pob Zeb, tab sis mas Pob Zeb tsis to
taub li. Nws siv lo lus “Phileo” los yog kev nyiam hauv cov npawg, cov phooj ywg,
los kev nyiam nruab nrab xib hwb thiab cov thwj tij xwb. Kev nyiam loj tshaj plaws
uas cov neeg ntseeg yuav tsum ua raws kom tau yog “agape” los kev nyiam luag tej
uas yus tsis xav dab tsi rov qab, qhov no yog kev nyiam uas dawb thiab huv los kev
nyiam ntshiab kawg. Yog peb nyiam Yes Xus, peb kuj yuav tsum ua raws nws hais
thiab ua. Peb raws nws mus. Peb raws nws ua. Peb raws nws nyiam. Hnub no, Huab
Tais Yes Xus kug nug peb sawv daws txhua leej txhua tus thiab, “Aws! Kuv tus me
tub me ntxhais, koj puas nyiam kuv lod?”