ZAJ NYEEM NIAJ HNUB. Tim 14 lub 6 hlis 2022 (Daily reflection)

HNUB TIM 14 LUB 6 HLI, HNUB PEB LUB LIS PIAM 11 CAIJ NYOB NRUAB XYOOS
COV LUS NYOB HAUV MAS TAIS NTAWV MOO ZOO, ZAJ 5 QIB 43-48 HAIS TIAS……. MT 5: 43-48…

Cov kwv tij ntseeg Ntuj sawv daws, muaj ib yam uas peb txawv cov coj lwm txoj kev teev hawm. Qhov ntawd yog peb nyiam txhua tus neeg, tsis hais tus phem los tus zoo, tus yog yus phooj ywg los yog yus yeeb ncuab. Peb tsum nyiam ib yam li lawv yog peb ib tug kwv tij koom tib lub plab, koom tib tug niam tib tug txiv, vim lawv thiab peb puas leej yog Tswv Ntuj cov me nyuam.
Huab Tais Yes Xus tau qhia kom peb ntxub kev txhaum kev qias, kev phem kev tsis huv; tsis yog kom peb ntxub leej neeg.
Thiab Huab Tais Yes Xus tseem qhia kom peb xyaum ua neeg kom zoo tshaj mas peb thiaj tsim nyog ua Tswv Ntuj ib tug me nyuam.
Kwv tij Hmoob sawv daws, thov kom nej txhob cais cov tau ua tsis zoo rau nej tawm hauv nej txoj kev nyiam kev hlub, thov kom nej txhob tshwj zias nej kev nyiam, nej lo lus zoo, nej cov hauj lwm zoo rau nej kwv nej tij, nej niam nej txiv, nej cov me nyuam thiab nej lub cuab xwb.
Nej yuav tau pub rau lwm tus thiab mog.
Nyob zoo sawv daws.