Hnub Chiv Tim 26 Lub 6 Hlis 2022 (Sunday Homily)

Hnub Chiv Tim 26 lub 6 Hlis 2022
Lub caij nyob nruab xyoo
Lus Kas 9: 51-62

“Hma muaj hma lub qhov nkaum, hos tej noog ya saum ntuj los lawv muaj lawv lub zes. Tab sis Neeg Leej Tub tsis muaj chaw rau ncoo. Leej twg tuav rab khais lawm, nws tseem tig ntsia rov tom qab, mas nws tsis phim Tswv Ntuj lub Ceeb Tsheej.”
Nyob zoo ib tsoom niam txiv kwv tij neeg tsa hmov thiab tshua.
Kev ua yus lub neej raws Huab Tais Yes Xus qab tsis yooj yim. Muaj ntau yam yus yuav tsum tso pov tseg thiaj ua rau yus raws Yes Xus qab tau. Thaum peb txiav siab raws Yes Xus qab, kev txhawj xeeb los yam nyuaj siab ntau yam, yus yuav tsum cia yam ntawd pov tseg, ces muab siab ua raws li Huab Tais Yes Xus qhia peb.
Tib neeg muaj kev txhawj xeeb, sawv daws muaj txoj hauj lwm. Qees leej yuav tsum saib xyuas yim neeg tsev neeg, qee leej yuav tsum nrhiav noj nrhiav haus rau yus cov me tub me nyuam, qee leej saib xyuas yus niam yus txiv, qee leej yuav tsum ua lag ua luam, sawv daws muaj lub luag hauj lwm. Ces, txoj hauj lwm no ntau zaus ua rau peb muaj kev nyuaj siab hauv txoj kev ua lub neej raws Yes Xus mus. Huab Tais Yes Xus hais tias “Koj cia cov tuag faus lawv cov neeg tuag, hos koj mas koj mus tshaj Tswv Ntuj lub Ceeb Tsheej.” Huab Tais Yes Xus hais li ntawd tsis txhais tias yus yuav tsum txhob saib xyuas yim neeg tsev neeg, nrhiav noj nrhiav haus rau yus cov me tub me nyuam, saib xyuas yus niam yus txiv, yuav tsum ua lag ua luam, vim tias Huab Tais Yes Xus xav peb muab siab rau peb cov hauj lwm xws li cov neeg ntseeg Catholic thiab os. kev txhawj xeeb ua rau yus tsis muaj sij hawm muab siab ua raws li Huab Tais Yes Xus qhia. Leej twg tuav rab khais lawm, nws tseem tig ntsia rov tom qab, mas nws tsis phim Tswv Ntuj lub Ceeb Tsheej.” Txhob ua xyem xyav. Thov peb sawv daws rau siab ua neej xws li Catholic txoj cai. “Hma muaj hma lub qhov nkaum, hos tej noog ya saum ntuj los lawv muaj lawv lub zes. Tab sis Neeg Leej Tub tsis muaj chaw rau ncoo.” Cov lus no hais txog thaum yus txiav txim siab raws Huab Tais Yes Xus mus, yus yuav tsum tsis txhawj xeeb dhau. Tswv Ntuj yuav saib xyuas peb raws li Tswv Ntuj lub siab xav. Thov kom Leej Ntuj Plig Ntshiab pub lub txiaj ntsim rau peb kom peb muaj zog raws Huab Tais Yes Xus mus ib txhiab ib txhis.