ZAJ NYEEM NIAJ HNUB. Tim 4 lub 7 hli 2022 (Daily reflection)

ZAJ NYEEM HNUB TIM 4 LUB 7 HLI, NCO TXOG LEEJ NTSHIAB ES LIS XAS NPES, POJ VAJ NYOB POS TWS NKAS.
COV LUS NYOB HAUV MAS TAIS NTAWV MOO ZOO (MT 9: 18-26)

Kwv tij Hmoob sawv daws, lub Moo Zoo hnub no muaj 2 yam xwm: 1) muaj ib tug nom tuaj txhos caug thov Huab Tais Yes Xus mus pab cawm nws tus me ntxhais txoj sia, 2) muaj ib tug poj niam tsob ntshav nws muaj lub siab ntseeg ces nws qhov tsob ntshav cia li zoo hlo.
Ob yam xwm no qhia 3 yam li no rau peb: yog peb nyiam ua ‘neeg me’, ‘ntseeg’ thiab ‘tso siab’ tias Huab Tais Yes Xus muaj hwj huam cawm tau peb, mas peb yuav tau pom Huab Tais Yes Xus lub hwj huam. 
Xws li peb pom tias leej txiv nws yog ib tug nom tsis kav nws tsis siv nws lub hwj chim mus yuam kom Huab Tais Yes Xus kav tsij mus kho nws tus ntxhais, nws txhos caug ntua ntawm Yes Xus thiab tsa ncauj thov Huab Tais Yes Xus pab mus tsa tes rau saum nws tus ntxhais. Nws yog pej kum neeg tsis kav nws txhos caug ntawm lwm haiv neeg ko taw, nws ntseeg tias Huab Tais Yes Xus yog tus muaj hwj huam tiag, nws tso siab lug tias Huab Tais Yes Xus muaj hwj huam cawm tau nws tus ntxhais.
Tus poj niam tsob ntshav, nws tsuas hnov luag cav txog Huab Tais Yes Xus, nws lub siab ntseeg ces nws ua tiag pus nws lub cev mob tuaj nrhiav Huab Tais Yes Xus, nws tu siab tias nws qhov mob yog nws cov txhaum, nws tsis muaj cuab kav yuav mus thov Huab Tais Yes Xus kom pab nws, nws thiaj xav twj ywm hauv nruab siab tias ‘cia kuv kov Huab Tais Yes Xus lub tw tsho xwb, mas kuv yuav zoo.’ Nws tsis hais tias ‘tej zaum kuv yuav zoo’, tiam sis nws ntseeg tias ‘nws yuav zoo.’
Kwv tij Hmoob sawv daws, tus nom thiab tus poj niam tsob ntshav, nkawd tau raws li nkawd tso siab. Yog li mas hnub no thov kom peb ua ib tug neeg me mus txhos caug ntua ntawm Huab Tais Yes Xus xub ntiag, peb ntseeg tias Huab Tais Yes Xus yog tus cawm peb, pab peb, ces peb yuav cev tej kev txom nyem rau Huab Tais Yes Xus ua tus pab peb mog!