ZAJ NYEEM NIAJ HNUB. Tim 6 lub 7 hli 2022 (Daily reflection)

ZAJ NYEEM HNUB TIM 6 LUB 7 HLI, NCO TXOG LEEJ NTSHIAB MAB LIAB- NKOS LES TIS.
COV LUS NYOB HAUV MAS TAIS NTAWV MOO ZOO (MT 10: 1-7)

Cov kwv tij Hmoob, thaum Huab Tais Yes Xus xaiv cov thwj tim 12 leeg los ua nws cov Hauv Paus Xa Lus, ces Huab Tais Yes Xus xa lawv mus tshaj Ntuj Lus rau hauv cov zej zos haiv neeg His Xas Lais. Huab Tais Yes Xus ntuas lawv kom coj ncaj rau qhov tseeb thiab pub lub hwj huam rau lawv kom ntiab tau dab thiab kho tau cov neeg mob xws li nws.
Kwv tij Hmoob sawv daws, nej hnov Huab Tais Yes Xus hais tias ‘nej xub mus cuag cov yaj ploj hauv haiv His Xas Lais’, mas tej zaum nej yuav xav tias Huab Tais Yes Xus tshwj txoj kev ntseeg no cia rau cov His Xas Lais xwb, txoj kev ntseeg no yog haiv neeg His Xas Lais txoj, tsis yog peb Hmoob li.
Huab Tais Yes Xus hais tias ‘nej xub mus cuag cov yaj ploj hauv hais His Xas Lais’ tsis yog hais tias ‘nej tsuas mus cuag cov yaj ploj hauv haiv His Xas Lais’.
Huab Tais Yes Xus xav kom cov His Xas Lais uas yog haiv neeg Tswv Ntuj xaiv tau txais lub txiaj ntsim no ua ntej, vim lawv zoo tam li tus tub hlob uas yuav xub tau txais leej txiv lub cuab tam ua ntej cov kwv, thiab lawv yuav yog tus sawv leej txiv chaw pub lub cuab tam rau nws cov kwv, pab nws cov kwv kom sawv tau.
Tom qab sawv rov los, Huab Tais Yes Xus thiaj hais rau cov Hauv Paus Xa Lus tias ‘nej mus thoob qab ntuj, nej tshaj lub Moo Zoo rau txhua leej txhua tus.’
Li ntawd mas kwv tij Hmoob, txoj kev ntseeg Ntuj no thiaj tsis yog tshwj cia rau haiv His Xas Lais xwb, tiam sis yog cia rau tas ntiaj teb neeg sawv daws.
Peb haiv Hmoob yog ib haiv nyob hauv qab ntuj no, ces txoj kev ntseeg Ntuj no thiaj yog cia rau peb thiab.
Yog li mas kwv tij Hmoob sawv daws, peb yuav kub siab nrhiav qhov tseeb nyob hauv Huab Tais Yes Xus thiab coj lub neej mus raws qhov ncaj xws li Huab Tais Yes Xus tau qhia kom cov Hauv Paus Xa Lus coj tuaj txog peb mog!