Hnub Chiv Tim 3 Lub 7 Hlis 2022 (Sunday Homily)

Hnub Chiv Tim 6 Lub 6 Hlis

Lub cail nruab xyoo
Mas Tais 16:13-19
“Nej ne, nej hais tias kuv yog leej twg?” “Koj yog Leej Pleev, yog tus Tswv Ntuj
Muaj Txoj Sia Leej Tub.”

Hnub no lub Koom Txoos Catholic ua hmoov nco txog Leej Ntshiab Pob Zeb thiab
Paj Lug. Ua cas peb ho ua hmoov nco txog?
Ob tug Leej Ntshiab no yog cov thawj coj hauv npawg ntseeg Yes Xus yav ua ntej.
Yes Xus tsa Pob Zeb sawv nws chaws coj cov thwj tim thiab cov neeg ntseeg. Yes
Xus txhim nws lub Koom Txoos nyob saum lub pob zeb no. Peb cov ntseeg
Catholic ntseeg tias Pob Zeb yog tus sawv Yes Xus chaws thiab tus sawv nws
chaws ntxiv los yog Vaj Qhia. Niaj hnub nyem no Vaj Qhia Francis yog tus sawv
Pob Zeb chaws. Qhov no muaj lub ntsiab tias nws yog tus sawv Yes Xus chaws.
Vim li ntawd peb yuav tsum mloog nws cov lus qhia.
Paj Lug yog tus tshaj Ntuj lus rau lwm haiv neeg. Nws yog tus ua kom lub Koom
Txoos nthuav mus deb thiab ua kom muaj cov ntseeg coob tuaj. Ob tug Leej
Ntshiab no thiaj yog ob tug neeg tseem ceeb ua kom kev ntseeg los txog peb. Lub
Koom Txoos Catholic ua hmoov nco txog nkawd.
Hauv txoj kev ntseeg no, peb tau hnov coob leej hais txog kev ntseeg txog Yes
Xus, qhia txoj Yes Xus lub neej ua ub ua no thiab ntaum yam…hais tsis tag! Hauv
Mas Tais Ntawv Moo Zoo hnub no, Huab Tais Yes Xus nug lo lus nug tseem ceeb
tias “nej ne, nej hais tias kuv yog leej twg?” Pob Zeb sawv peb chaws teb Huab
Tais Yes Xus tias “Koj yog Leej Pleev, yog tus Tswv Ntuj muaj txoj sia Leej Tub.”
Tab sis mas, hnub no peb yuav tsum nyias teb nyias hais tias Yes Xus yog leej twg
ntawm yus tus kheej raws li Yus ntsib Yes Xus hauv Yus lub neej. Tsis muaj leej
twg yuav sawv chaws teb yus tau? Vim yog tias, txoj kev ntseeg no yog yus lub
neej ntawm yus tus kheej thiab Yes Xus. Kuv ntseeg tias tus tau ntsib Yes Xus
yuav teb zoo li Pob Zeb, “Yes Xus, koj yog Leej Pleev, yog tus Tswv Ntuj muaj
txoj sia nws Leej Tub.” Txhua hnub chiv peb tshaj zaj kuv ntseeg txog Tswv Ntuj.
Peb puas ntseeg raws li peb lub qhov ncauj hais? Peb lub siab thiab peb lub tswv
yim puas ntseeg raws li lub qhov ncauj tshaj?

Thov Tswv Ntuj foom koob foom hmoov rau nej sawv daws kom nej sawv daws
muaj kev ntseeg nruaj nreb mog!