ZAJ NYEEM NIAJ HNUB. Tim 18 lub 7 hli 2022 (Daily reflection)

ZAJ NYEEM HNUB TIM 18 LUB 7 HLI, HNUB OB LUB LIS PIAM 16 CAIJ NYOB NRUAB XYOO
COV LUS NYOB HAUV MAS TAIS NTAWV MOO ZOO (MT 12: 38-42)

Cov kwv tij, Ntawv Moo Zoo hnub no nej hnov Huab Tais Yes Xus hais txog Yos Nas lub cim.
Yos Nas yog leej twg? Yos Nas yog tus yaj saub Tsw Ntuj xa mus tshaj Ntuj Lus rau cov neeg hauv nroog Nis Nis Vas kom lawv hloov siab tshiab mas lawv thiaj yuav tsis raug txim.
Yos Nas tsis xav mus ntuas cov neeg txhaum ntawd, ces Tswv Ntuj thiaj cia Yos Nas nyob 3 hnub 3 hmos hauv tus vaj ntses lub plab. Qhov kawg Yos Nas thiaj kam mus ntuas cov neeg hauv Nis Nis Vas, ces lawv sawv daws hloov siab, Tswv Ntuj thiaj tsis muab txim rau lub nroog Nis Nis Vas.
Kwv tij Hmoob sawv daws, cov neeg Yus Das lawv hais rau Huab Tais Yes Xus tias ‘koj ua ib lub cim rau peb pom mas, ces peb yuav ntseeg tias koj yog tus tuaj ntawm Tswv Ntuj tuaj, yog tus yuav los cawm peb!’
Thaum ntawd, Huab Tais Yes Xus tsis ua ib lub cim dab tsi rau lawv pom, nws tsis xav kom neeg ntseeg nws vim neeg tau pom tej lub cim los yog pom nws lub hwj chim.
Tab sis kwv tij Hmoob sawv daws, tom qab ntawd mas Huab Tais Yes Xus twb ua lub cim loj tshaj rau sawv daws pom, yog sawv hauv cov tub tuag rov los thiab nce mus nrog Tswv Ntuj nyob pem ntuj.
Li ntawd mas kwv tij Hmoob sawv daws, txawm peb tsis pom los peb twb hnov thiab paub zoo txog, yog li peb yuav ntseeg tias Huab Tais Yes Xus yog tus tuaj ntawm Tswv Ntuj tuaj tiag, nws yog Tswv Ntuj Leej Tub.
Peb yuav mloog nws cov lus, thiab coj nraim nws cov lus nyob hauv peb lub neej, mas txog hnub txiav txim peb thiaj yuav tsis raug txiav txim xws li cov neeg thaud uas lawv tsis kam txais Yes Xus ua lawv tus Huab Tais mog! Nyob zoo sawv daws.