ZAJ NYEEM NIAJ HNUB. Tim 20 lub 7 hli 2022 (Daily reflection)

ZAJ NYEEM HNUB TIM 20 LUB 7 HLI, NCO TXOG LEEJ NTSHIAB AS POS LIS NAS LIS
COV LUS NYOB HAUV MAS TAIS NTAWV MOO ZOO (MT 13: 1-9)

Kwv tij Hmoob sawv daws, Huab Tais Yes Xus zaj paj lug tus tseb nplej no, mas tej zaum nej yuav to taub yooj yim, vim peb Hmoob yeej ib txwm cog nplej. Nyob rau lub caij no mas yog caij nplej tab tom dauv tw qaib laum teb ntsuab xiab. Tab sis hnov hais tias muaj ntau thaj tsam mas nplej xem tas thiab ntau thaj tsam nplej kuj tuaj tsis xwm yeem.
Yog peb ua tib zoo saib, yuav pom tias daim teb nplej xem thiab tuaj tsis xwm yeem mas yog nyob rau thaj chaw av tsis zoo, fab fab, av qhuav tsis tau nag ywg, thiab yog raug tshuaj tua nroj.
Peb txoj kev ntseeg ces zoo xws li ntawd tiag. Peb tam li daim teb, hos Tswv Ntuj lo lus tam li cov noob nplej. Tus neeg twg muaj siab mloog thiab nyiam ua raws Tswv Ntuj lo lus, ces nws zoo li daim teb muaj chiv ua rau nplej tuaj ntsuab xiab ntom teb. Tus neeg twg ua siab ntxhib mas Tswv Ntuj lo lus nrhau cag tsis taus nyob hauv nws. Tus neeg siab sib mas nws nyiam mloog tus ub tus no hais ces nws zoo li daim teb pob zeb uas Tswv Ntuj lub noob tuaj kaus sai tab sis lub siab ua xyem xyav ntxeev siab mus raws luag lwm tus ntxias. 
Kwv tij Hmoob sawv daws, peb xav kom nej ua xws li daim teb av zoo, nej ua siab muag, qhib siab thiab cia Tswv Ntuj lo lus mus nyob hauv nej, maj mam kawm, maj mam yoog raws kom Tswv Ntuj lo lus tuaj kaus nyob hauv nej.
Thaum Tswv Ntuj lo lus nrhau cag nyob hauv peb lawm, peb yuav nrhiav dej nrhiav chiv los yug kom loj, kom txhawv hnab nyob hauv peb. Peb yuav coj Tswv Ntuj lo lus cov noob nyob hauv peb mus tseb rau lwm thaj av kom yim muaj ntau ntxiv mus mog! Nyob zoo sawv daws.