ZAJ NYEEM NIAJ HNUB. Tim 22 lub 7 hli 2022 (Daily reflection)

ZAJ NYEEM HNUB TIM 22 LUB 7 HLI, UA HMOOV LEEJ NTSHIAB MAB LIAB MAS NTAS LAS 
COV LUS NYOB HAUV ZAM NTAWV MOO ZOO (Z 20: 1-2, 11-18)

Kwv tij Hmoob sawv daws, hnub no Koom Txoos ua hmoov nco txog Leej Ntshiab Mab Liab Mas Ntas Las, yog li Koom Txoos thiaj xaiv zaj nyeem hauv Zam Ntawv Moo Zoo raws li nej hnov hauv hnub no los cia rau sawv daws tau twm tau muab los ntuas siab.
Thaum lawv txo Huab Tais Yes Xus lub cev coj mus cia hauv lub qhov ntxa lawm, hnub chiv yav sawv ntxov, Mab Liab Mas Ntas Las sawv kev mus tom Huab Tais Yes Xus lub ntxa. Nws pom tias daim txiag zeb npog lub qhov ntxa raug txav, tsis pom Huab Tais Yes Xus lub cev lawm. Nws khiav los hais rau Pob Zeb thiab Zam, lawv rov qab mus xyuas pom muaj tseeb li Mab Liab Mas Ntas Las hais tiag. Pob Zeb thiab Zam rov los, tshuav Mab Liab Mas Ntas Las nyob ntawm lub qhov ntxa. Nws ke quaj ke xauj mus hauv lub qhov ntxa, ces Huab Tais Yes Xus thiab 2 tug Tshiab txawm tawm los rau nws pom thiab hais kom Mab Liab rov los xa xov rau cov thwj tim.
Kwv tij Hmoob sawv daws, Mab Liab Mas Ntas Las thiab cov thwj tim, lawv txoj hmoov zoo rau qhov tias lawv pom Huab Tais Yes Xus sawv rov los. Peb cov neeg ntseeg los peb kuj tau txoj hmoov zoo vim niaj lis piam Hnub Chiv peb kuj pom Huab Tais Yes Xus sawv rov los thiab. Peb pom nyob hauv lub ncuav mov mog txia ua Huab Tais Yes Xus lub Cev thiab cov Ntshav, los yog lub Cim Yug.
Thaum Txiv Plig muab lub Cim Yug tsa siab mas yog Huab Tais Yes Xus tab tom sawv ntsiab ntsoov peb xws li hnub nws sawv ntsia Mab Liab Mas Ntas Las. Nws hais lus rau peb, nplij peb siab kom rov kaj, thiab tab tom hais kom peb tawm mus tshaj nws lub Moo Zoo no rau lwm tus.
Yog li mas kwv tij Hmoob sawv daws, peb yuav ua xws li Leej Ntshiab Mab Liab Mas Ntas Las, yog tawm mus hais rau lwm tus tias ‘hnub no, kuv pom Huab Tais Yes Xus lawm, nws hais cov lus no rau kuv.’
Nyob zoo sawv daws.