Hnub Chiv Tim 17 Lub 7 Hlis 2022 (Sunday Homily)

Hnub Chiv Tim 17 Lub 7 Hlis 2022  Lub caij nyob nruab xyoo
Lus Kas 10:38-42

“Mas Tas, koj txhawj thiab ua siab fab lis ntau yam, tab sis yuav tsum muaj tsawg, tsuas
yuav tib yam xwb. Mab Liab xaiv tau qhov zoo tshaj, yuav tsis txhob muab tshem ntawm
nws.”
Nyob zoo ib tsoom…
Ntawv Moo Zoo hnub no, peb hnov Lus Kas hais txog Mab Liab thiab Mas Tas. Nyob
hauv Zam Ntawv Moo Zoo peb paub tias Mab Liab thiab Mas Tas yog Las Ntxas Los ob
tug viv ncaus. Lawv yog Huab Tais Yes Xus cov phooj ywg zoo. Huab Tais Yes Xus
nyiam lawv tshaj li. Mab Liab thiab Mas Tas tus sawv peb sawv ntawm yus ua lub neej
zoo li cas.
Mas Tas yog tus txais Huab Tais Yes Xus los hauv nws tsev. Mas Tas yog tus ua hauj
lwm npaj ntau yam tsob hwb Huab Tais Yes Xus. Nws rau siab ntso lis ntau yam qav
num tshaj dhau ua rau nws tsis muab siab mloog Huab Tais Yes Xus lo lus, ua rau nws
tsis muaj sij hawm rau siab rau qhov uas tseem ceeb tshaj dua. Hos Mab Liab, thaum
Huab Tais Yes Yes nkag lub tsev, nws kuj zaum ntawm Huab Tais Yes Xus ko taw, nws
mloog Huab Tais hais lus. Ntawm Mab Liab, lub sij hawm ntawd muaj nqes tshaj plaws
vim tias Huab Tais Yes Xus nrog nws nyob, Huab Tais nrog nws tham, ua cas nws ho
yuav tsum ua lwm yam muaj nqes tsawg dua.
Ntawm peb sawv daws, ntau zaum peb kuj ua neej ib yam li Mas Tas uas peb rau siab
ntso lis ntau yam qav num, tsis muab siab mloog Huab Tais Yes Xus cov lus. Lub siab
uas puv tas vim muaj hauj lwm muaj ntau yam qav num kuj tsis muaj chaws khoob hauv
lub siab rau Tswv Ntuj zoo li Mas Tas thiab. Ces Huab Tais Yes Xus yuav hais rau peb
tias “Mas Tas, koj txhawj thiab ua siab fab lis ntau yam, tab sis yuav tsum muaj tsawg,
tsuas yuav tib yam xwb. Mab Liab xaiv tau qhov zoo tshaj, yuav tsis txhob muab tshem
ntawm nws.” Qhov zoo tshaj yog Huab Tais Tswv Ntuj! Yus muaj 1 xuab moos los ib
teev uas yus mloog Tswv Ntuj hauv lub thaj txi ntuj tau. Los yus siv 2-3 feeb los nas this
nyeem Tswv Ntuj lo lus ua ntej yus mus pw kuj tau. Nyem tsis ntev os nyeem ob peb lo
lus luv luv xwb. Tswv Ntuj lo lus tsuas 2-3 lo lus kuj muaj hwj chim hloov peb lub siab
lub neej kiag li. Kuv caw peb sawv daws ua li no txhua hnub txhub hmo, ces peb yuav
pom tias Huab Tais tswv Ntuj ua ntau yam zoo hauv peb lub neej. Nyob zoo sawv
daws.