Hnub Chiv Tim 24 Lub 7 Hlis 2022 (Sunday Homily)

Hnub Chiv Tim 24 Lub 7 Hlis 2022
Lub caij nyob nruab xyoo
Lus Kas 11:1-13

“Nej thov, Ntuj yuav pub rau nej. Nej nhriav, ces nej yuav ntsib. Nej khob qhov rooj, Ntuj yuav qhib rau nej.”
Nyob zoo ib tsoom…
 Huab Tais Yes Xus ib tug thwj tim thov nws qhia lawv teev Ntuj. Ces, Huab Tais Yes Xus qhia zaj “Peb Txiv” rau nws. Zaj peb txiv thiaj yog zaj teev Ntuj uas Huab Tais Yes Xus nws tus kheej qhia peb. Hauv zaj peb txiv kuj hais txog “kev thov Ntuj.” Peb tib neeg yus ua ib puas tsav yam tsis tau. Yus xav tau Tswv Ntuj los pab yus, yus xav tau thov Tswv Ntuj pub lub ntxiaj ntsim rau yus. Ntawm peb txhais tes, peb thov Tswv Ntuj niaj hnub pub mov rau peb noj txwm hnub. Thov Tswv Ntuj niaj hnub pub mov rau peb noj txwm hnub txhais tias “thov kom peb muaj zog muaj txoj sia ntxiv mus.” Thov Tswv Ntuj kom peb tseem muaj noj muaj haus. Ces, txhua hnub txhua hmo, peb paub tias peb tej zaus ua neeg tsis dawb tsis huv, tseem muaj txhaum, tseem ua txhuam, peb thov Tswv zam txhaum rau peb. Thiab peb kuj yuav tsum zam txhaum rau cov tshuav nqi ntawm peb thiab. Ces, peb thov Leej Txiv Tswv Ntuj txhob cia peb poob rau hauv txoj kev ntxias, kev tsis zoo. Kev ntxias kuj muaj ntau yam, muaj yam uas peb pom thiab tsis pom. Peb yuav tsum thov Ntuj txhua hnub los txhua hmo ua ntej peb mus pw los mus ua hauj lwm kom nws pab peb mog. Huav Ntawv Moo Zoo hnub no Lus Kas thov kom peb ua siab loj txhob nkees thov Ntuj. Qee leej hais tias aww kuv thov Tswv Ntuj lawm, tab sis kuv tsis tau txais dab tsi. Tswv Ntuj tsis pub dab tsi rau kuv. Tsis hais li ntawd, tej zaus, Tswv Ntuj pub lawm tab sis mas peb tsis pom kuj muaj. Los, tej zaus Tswv Ntuj pub yam uas peb tsis pom tseem ceeb, tab sis Tswv Ntuj xaiv qhov uas tseem ceeb tshaj plaws rau peb kuj muaj. 
Lus Kas hais tias yus yuav tsum thov thov thov, ces Leej Txiv yuav pub. “Nej thov, Ntuj yuav pub rau nej. Nej nhriav, ces nej yuav ntsib. Nej khob qhov rooj, Ntuj yuav qhib rau nej.”
Kev thov Ntuj yog kev teev Ntuj. Thaum peb thov Ntuj, peb thiab Tswv Ntuj tab tom sib tham, peb tab tom ua kev sib raug zoo, ua kom peb lub siab lub ntsws nyob ze Huab Tais Tswv Ntuj. 

“Nej thov, Ntuj yuav pub rau nej. Nej nhriav, ces nej yuav ntsib.  
Nyob zoo sawv daws!