Hnub Chiv Tim 7 Lub 8 Hlis 2022 (Sunday Homily)

Hnub Chiv Tim 7 Lub 8 Hlis 2022

Lub caij nyob nruab xyoo
Lus Kas 12:32-48

Nyob zoo ib tsoom…
Hauv Ntawv Moo Zoo hnub no Huab Tais Yes Xus qhia rau peb sawv daws tias peb
yuav tsum ua neej ib yam li cov tub txib uas thaum tus tswv los txog, nws pom lawv
tseem zov hmo, mas lawv txoj hmoov zoo. Cov tub txib ntawd ua dab tsi lawv thiaj txoj
hmoov zoo, tus tswv thiaj zoo siab tos txais lawv mus zaum ntawm rooj mov?
Muaj ob yam tab tom tshwm sim tuaj nyob qhov no. yam tim ib, cov tub txib lawv tsis
paub tias thaum twg tus tswv tswv yuav rov los, tsis muaj leej twg paub thaum twg nws
thiaj rov los txog. Tsis muaj leej twg paub sij hawm uas tus tswv yuav rov los txog. Zaj
paj lug no qhia kom peb paub tias lub sij hawm uas Huab Tais Tswv Ntuj yuav rov los
kuj zoo ib yam thiab. Peb tsis paub thaum twg nws yuav rov los. Ntawm peb lub neej kuj
zoo ib yam thiab. Peb tsis paub tias thaum twg Huab Tais Tswv Ntuj yuav rov los hu
peb mus nrog nws nyob saum Ntuj lub ceeb tsheej. Peb tsis paub tias thaum twg Tswv
Ntuj yuav rov los coj peb tus tsuj plig mus. Peb kuj tsis paub tias thaum twg peb lub neej
yuav tag. Vim li ntawd peb yuav tsum ua li cas thiaj tsim nyog mus zaum ntawm Tswv
Ntuj rooj mov, peb yuav tsum ua li cas thiaj muaj txoj hmoov zoo?
Yam tim ob cov tub txib npaj lawv tus kheej ua hauj lwm kom zoo, lawv thiaj txoj hmoov
zoo. Cov tub txib yog tus piv ntxwv rau peb tias peb yuav ua li cas. Cov tub txib npaj
lawv tus kheej kom txhij, lawv ua txoj hauj lwm kom zoo. Lawv tsis txhawj xeeb tias
thaum twg tus tswv yuav rov los vim tias lawv ua txoj hauj lwm kom zoo tshaj plaws
lawm. Thaum tus tswv rov los txog, nws yuav zoo siab kawg. Peb cov neeg ntseeg Kas
Tos Liv txoj hauj lwm kuj zoo ib yam. Peb yuav tsum pib nhriav Tswv Ntuj lawm. Peb
yuav tsum pib pab ua Tswv Ntuj txoj hauj lwm lawm, ua txoj hauj lwm raws li lub Koom
Txoos Kas Tos Liv kom zoo. Lub koom txoos txoj cai kuj ib yam li mus teev Ntuj, mus
koom thaj txi Ntuj txhua hnub chiv, ntseeg txog Tswv Ntuj tib leeg xwb, hlub lwm tus,
khuv leej lwm tus, zam txim rau luag tej thiab lwm yam. Txhob tos kom txog rau thaum
yus tsis muaj zog lawm los txhob tos kom txog rau thaum yus muaj mob muaj nkeeg
txoj sia yuav plog mus lawm. Txhob tos ntev ntev vim tias peb tsis paub lub sij hawm no
naj. Ua txoj hauj lwm kom zoo, Tswv Ntuj txoj hauj, lub Koom Txoos txoj hauj lwm, peb
yuav tsum rau siab ua kom zoo thiab mog.