ZAJ NYEEM NIAJ HNUB. Tim 8 lub 8 hli 2022 (Daily reflection)

ZAJ NYEEM HNUB TIM 8 LUB 8 HLI, NCO TXOG LEEJ NTSHIAB DOS MIS NIS
COV LUS NYOB HAUV MAS TAIS NTAWV MOO ZOO (MT 17: 22-27)

Kwv tij Hmoob sawv daws, Ntawv Moo Zoo piav tias thaum Huab Tais Yes Xus lawv tuaj txog Kas Fas Naus, mas cov sau se rau lub Tuam Tsev Teev Ntuj hais kom Huab Tais Yes Xus lawv them se pab lub Tuam Tsev Teev Ntuj, ces Huab Tais Yes Xus thiaj kom Pob Zeb mus nuv ntses nram dej ntuj, mas yuav muaj lub txiaj nyiag nyobhauv tus ntses lub qhov ncauj, thau lub txiaj nyiag ntawd los them se rau lub Tuam Tsev Teev Ntuj.
Kwv tij Hmoob sawv daws, muab lub txiaj nyiag hauv tus ntses lub qhov ncauj los them se rau lub Tuam Tsev Teev Ntuj mas yog Huab Tais Yes Xus tab tom hais tias nws yuav raug luag ntes coj mus tua tuag, tab sis nws kev tuag yuav ua txim txi rau Tswv Ntuj kom tau txhiv ntiaj teb neeg hauv kev txhaum xws li yog muab lub txiaj nyiag los them se rau lub Tuam Tsev Teev Ntuj.
Huab Tais Yes Xus yuav nug peb xws li nug Pob Zeb tias ‘raws li koj xav, cov vaj kav ntiaj teb sau se ntawm leej twg, puas yog ntawm cov tub los yog ntawm cov qhua?’, mas peb kawg yuav teb xws li Pob Zeb hais rau Huab Tais Yes Xus tias ‘luag sau se ntawm cov qhua.’ Ces Huab Tais Yes Xus yuav hais ntxiv rau peb tias ‘koj tsis txhob ua kom luag to taub yuam kev xws li koj xav mog!’
Cov kwv tij Hmoob, raws ntiaj teb txoj kev xav mas yeej yog li Pob Zeb hais tiag, tus vaj yog tus kav tas nrho nws tsoom pej xeem, nws lub teb chaws; yog li nws thiaj sau se ntawm sawv daws, sau tas sawv daws lub zog los ua hauj lwm rau nws lub teb chaws, los txhim kho nws lub teb chaws. Tab sis Tswv Ntuj tsis zoo li ntaij teb neeg cov vaj, Tswv Ntuj mas nws nyiam ntiaj teb neeg uas yog nws tsoom pej xeem, nws yeem sau se ntawm nws Leej Tub, nws yeem cia nws Leej Tub tuag kom tau txhiv nws tsoom pej xeem txoj sia.
Yam no yog yam Huab Tais Yes Xus xav kom peb tshaj rau peb tsoom kwv tij to taub, kom peb txhob ntxhov siab xws li cov thwj tim thaum hnov Huab Tais Yes Xus hais tias nws yuav raug ntes coj mus tua.
Tab sis peb yuav xyiv fab vim Tswv Ntuj hlub peb, nws thiaj tso nws Leej Tub los ua tus nqe them se rau peb, kom peb mus tau hauv lub Tuam Tsev Teev Ntuj. Nyob zoo sawv daws.