ZAJ NYEEM NIAJ HNUB. Tim 11 lub 8 hli 2022 (Daily reflection)

ZAJ NYEEM HNUB TIM 11 LUB 8 HLI, NCO TXOG LEEJ NTSHIAB NKAS LAS.
COV LUS NYOB HAUV MAS TAIS NTAWV MOO ZOO (MT 18: 21-19: 1)

Kwv tij Hmoob, cov lus hauv hnub no mas yog Huab Tais Yes Xus tab tom qhia peb kom txawj zam rau lwm tus tsis hais zam dab tsi kuj xij. Yog peb tsis zam rau lwm tus mas Tswv Ntuj yuav tsis zam rau peb xws li tus tub txib tsis hlub luag hauv zaj Huab Tais Yes Xus piav rau sawv daws mloog.
Huab Tais Yes Xus hais tias ‘koj yuav zam xya zaus xya caum zaus’ txhais tias thaum muaj leej twg ua tsis zoo rau peb, ua rau peb tu siab, los yog ua txhaum rau peb mas peb yuav zam rau nws tas mus li.
Cov kwv tij, peb niaj hnub ua txhaum rau Tswv Ntuj, peb pom tias Tswv Ntuj zam rau peb ib txwm, thiab Tswv Ntuj tos saib thaum twg peb thiaj yuav tu siab rau peb kev ua txhaum rau Tswv Ntuj.
Li ntawd mas kwv tij Hmoob, hnub no peb yuav zam rau tus tau ua txhaum rau peb, thiab peb yuav tsum tau mus hais rau tus peb tau ua txhaum rau nws, thov kom nws zam peb tej kev txhaum uas peb tau ua rau nws.
Peb yuav tu siab rau peb tej txhaum, mas peb thiaj yuav tsis ua txhaum rau lwm tus thiab Tswv Ntuj ntxiv. Nyob zoo sawv daws.