ZAJ NYEEM NIAJ HNUB. Tim 12 lub 8 hli 2022 (Daily reflection)

ZAJ NYEEM HNUB TIM 12 LUB 8 HLI, NCO TXOG LEEJ NTSHIAB ZUAG SOOS TAIS
COV LUS NYOB HAUV MAS TAIS NTAWV MOO ZOO (MT 19: 3-12)

Cov kwv tij Hmoob, zaj lus hauv hnub no mas zoo qhia peb cov ua txij nkawm kawg. Huab Tais Yes Xus hais tias ‘qhov uas Tswv Ntuj sau los ua ke, mas neeg tsis txhob muab cais.’
Thaum ib tug txiv neej thiab poj niam pom zoo sib sau koom ib lub siab ib lub cev ua ib cuab, mas yog nkawd sib nyiam sib hlub los sib ntshaw, vim tias thaum lub hauv paus Tswv Ntuj yeej tsim ib tug poj niam los phim rau ib tug txiv neej. 
Thaum txiv neej poj niam sib sau ua ib cuab lawm mas, nkawd yuav tsum coj lub neej ib leeg ncaj rau ib leeg, nkawd yuav saib kev sib nyiam sib hlub yog qhov loj tshaj, mas nkawd lub cuab thiaj yuav mus nto ntsis. 
Peb pom tias nyob hauv neeg lub neej mas muaj kev sib nrauj ntau; tej nkawm mas yog vim kwv tij neej tsa rhuav, tej nkawm mas vim nyob nyob mus ces nkawd txoj kev sib nyiam tsuag, tej nkawm mas vim nkawd sib zais siab, ib tug tsis coj ncaj rau ib tug, tej nkawm mas vim nkawd tsis txawj sib zam. 
Thaum lub cuab muaj teeb meem, nkawd cia li sib cais nyob, nkawd cia li mus ua ntawv sib nrauj, los yog kwv tij neej tsa muab nkawd nrauj.
Tej li hais los no mas yog neeg ua raws neeg siab xav, neeg lub tswv yim. Tab sis qhov tseeb mas Tswv Ntuj tsis pub kom 2 tug neeg txiav siab sib sau ua ib cuab ntawd sib cais sib nrauj. 
Yog li peb yuav ua li cas kom hauv peb lub cuab, hauv peb kev txij nkawm txhob raug teeb meem, kom hauv peb cuab peb yig tsuas muaj kev haum xeeb? 
Cov kwv tij, kawg peb tsum hloov siab thiab ua raws li Huab Tais Yes Xus cov lus qhia mas peb thiaj yuav txuag tau kom lub cuab txhob tawg.
Hauv lub Koom Txoos mas muaj cov tub lis dej num fab txhawb txhim lub cuab. Li ntawd mas vam tias ua ntej yuav muaj teeb meem nyob hauv lub cuab mas peb yuav kub siab mus fim thiab mus kawm kev ua lub neej txij nkawm hauv lub Koom Txoos los yog hais tus Txiv Plig hauv nej lub zos kom pab txhawb, pab qhia txog lub neej txij nkawm raws li Huab Tais Yes Xus lo lus qhia rau nej thiab nej nkawm, kom ob leeg txawj ua neej mus raws lub Moo Zoo. Nyob zoo sawv daws.