ZAJ NYEEM NIAJ HNUB. Tim 13 lub 8 hli 2022 (Daily reflection)

ZAJ NYEEM HNUB TIM 13 LUB 8 HLI, NCO TXOG LEEJ NTSHIAB VAJ QHIA POS TEES THIAB LEEJ NTSHIAB HIS POS LIS TUS
COV LUS NYOB HAUV MAS TAIS NTAWV MOO ZOO (MT 19: 13-15)

Cov kwv tij, peb Hmoob mas peb tsis tshua kheev cia tej me nyuam mus nrog tej laus neeg tham, peb ntshai tsam lawv txhoj pob ua tej yam tsis tsim nyog rau cov laus. Thaum peb mus teev Ntuj mas peb yuav hais rau tej me nyuam tias ‘nyob twj ywm, txhob dhia ua si’, los yuav hais tias ‘me nyuad, nej kav tsij tawm mus ua si sab nraud’, los hais tias ‘txhob luab luab lim lwm tus mas.’ 
Hnub no Huab Tais Yes Xus hais tias ‘nej cia cov me nyuam no tuaj cuag kuv mas, nej txhob txwv lawv.’
Thiab Huab Tais Yes Xus hais ntxiv tias ‘cov zoo xws li cov me nyuam no, mas lawv thiaj yuav tau Ntuj Ceeb Tsheej ua lawv tug.’
Kwv tij Hmoob sawv daws, tej me nyuam mas lawv xav tau dab tsi, xav ua dab tsi, xav hais dab tsi mas lawv cia li ua hlo, hais hlo. Lawv lub tswv yim tseem dawb paug xws daim ntaub dawb tsis tau tsuas ib tee dub. Li ntawd Huab Tais Yes Xus thiaj hais tias lawv yog cov yuav tau Ntuj lub Ceeb Tsheej.
Cov kwv tij, Huab Tais Yes Xus xav kom peb ua xws li cov me nyuam yaus; nkag mus nrhiav Tswv Ntuj, tsis txhob muab xav ntau ntau tias tsim nyog los tsis tsim nyog yuav nrog Tswv Ntuj tham, yuav txais Tswv Ntuj, txhob ua xyem xyav txog peb txoj kev ntseeg, thiab qhov tseem ceeb yog tsis txhob cia ntiaj teb lub tswv yim los txwv peb cia ntawm kev fim nrog Tswv Ntuj. Nyob zoo sawv daws.