Hnub Chiv Tim 14 Lub 8 Hlis 2022 (Sunday Homily)

Hnub Chiv Tim 14 Lub 8 Hlis 2022
Lub caij nyob nruab xyoo
Lus Kas 12:49-53

Nyob zoo ib tsoom…
Huab Tais Yes Xus cov lus qhia hauv Ntawv Moo Zoo hnub no ua rau peb xav tias ua cas Huab Tais Yes Xus thiaj hais li ntawd? Nws hais tias nws coj ib co hluav taws tuaj rau lub ntiaj teb muaj lub ntsiab dab tsi? Nws hais tias nws tsis tuaj pub kev thaj yeeb, tab sis nws coj kev sib ncaim tuaj muaj lub ntsiab dab tsi?
Huab Tais Yes Xus hais tias nws tsis tuaj pub kev thaj yeeb tab sis nws coj kev sib ncaim tuaj kuj vim tias Huab Tais Yes Xus cov thwj tim thiab cov raws nws qab xav tias Huab Tais Yes Xus yog ib tug vaj, nws yuav kav cov Isarael tag nrho. Nws yuav coj cov Israel tshem cov Roman, ces nws yuav pub kev thaj yeeb rau haiv neeg Israel. Cov Israel tos tus vaj tuaj cawm lawv ntev ntev lawm. Lawv thiaj muaj kev cia siab xav tias Huab Tais Yes Xus yog tus ntawd. Tab sis mas Huab Tais Yes Xus hais kom tseeb tias nws tsis yog tus pub kev thaj yeeb zoo li lawv xav. Tab sis mas, nws cov lus qhia thiab kev ua lub neej yuav ua rau yim neeg tsev neeg muaj kev sib ncaim, yuav ua rau phooj ywg sib ncaim. Huab Tais Yes Xus qhia tias nej hnov tej lus qhia tias qhov muag pauj qhov muag, kaus hniav pauj kaus hniav. Hos kuv hais rau nej: nej tsis txhob nrog tus neeg phem sib cav. Yuav ua li no: leej twg ib ncuav pias rau koj sab plhu xis, tig sab plhu laug rau nws thiab. Leej twg xav ua plaub rau koj kom tau koj lub tsho, mas koj muab koj lub tsho tshaj sab ntxiv rau nws thiab. Huab Tais Yes Xus cov lus qhia yog cov lus qhia tshiab. Ntau leej tsis nyiam, ntau leej txiav txim siab tsis raws nws qab kuj vim tias nws cov lus qhia no. nws cov lus qhia ua rau ntau leej sib ncaim. 
Ntau zaus Huab Tais Yes Xus cov lus qhia ua rau peb nyuaj siab, tej zaus Yes Xus cov lus qhia ua rau peb ntxhov siab kawg, tab sis mas peb kuj paub tias Huab Tais Yes Xus hais raug lawm, nws hais yog kawg lawm, tab sis mas peb lub siab tseem txais tsis tau. Peb tseem ua tsis tau. Ib yam li cov lus qhia no, Huab Tais Yes hais tias “Nej hnov tej lus qhia tias: koj yuav nyiam tus nyob ze koj, koj yuav ntxub koj tus yeeb ncuab. Tab sis, kuv hais rau nej tias: nej yuav nyiam nej cov yeeb ncuab, nej yuav thov Ntuj rau cov tsim txom nej. Yog nej nyiam cov neeg nyiam nej, mas nej yuav tau koob haum dab tsi?” Peb hnov cov lus qhia no, peb kuj paub tias nws hais zoo kawg, nws hais raug lawm, Yog nej nyiam cov neeg nyiam nej, mas nej yuav tau koob haum dab tsi?” nws hais zoo kawg maj. Tab sis, peb ua raws li nws hais puas tau? Nej sim xav raws li kuv hais, peb ua raws li Huab Tais Yes Xus hais puas tau? Hnub no Huab Tais Yes Xus coj kev sib ncaim hauv peb lub siab lub ntsws, hauv peb lub tswv yim lawm kom peb xav tswv yim txog Nws cov lus qhia thiab vam tias muaj ib hnub peb yuav ua raws li nws hais tau.