ZAJ NYEEM NIAJ HNUB. Tim 17 lub 8 hli 2022 (Daily reflection)

ZAJ NYEEM HNUB TIM 17 LUB 8 HLI, HNUB PLAUB LUB LIS PIAM 20 CAIJ NYOB NRUAB XYOO
COV LUS NYOB HAUV MAS TAIS NTAWV MOO ZOO (MT 20: 1-16a)

Cov kwv tij Hmoob sawv daws, nej mloog Huab Tais Yes Xus zaj paj lug no tas, mas nyaj nej yuav xav twj ywm hauv siab tias tus tswv teb mas nws coj tsis ncaj, nej yuav hlub cov tub zog tuaj ua zog ib hnub txwm nkaus, tab sis ua cas lawv tus nqi zog yog tau xws li tus tuaj ua ib teev xwb. Tsim nyog cov tuaj ua ntej yuav tau ntau dua cov tuaj tom qab mas.
Nej xav li no puas yog?
Kwv tij Hmoob sawv daws, peb ua neej nyob mas peb yeej xav thiab coj li ntawd tiag, tab sis nyob ntawm Tswv Ntuj mas tsis yog li ntawd. Tswv Ntuj kev txiav mas tsis yog tias tus neeg twg ua hauj lwm ntev dua los ua num tau ntau dua. Tswv Ntuj yuav txiav ib tug neeg twg lub txim los saib tias tus neeg twg tau ua zoo dua lwm tus, mas Tswv Ntuj txiav mus raws qhov tseeb, mus raws kev nyiam, kev hlub.
Nej twb hnov tias tus tswv teb nrog cov tub zog hais haum tias lawv tus nqi zog yog ib hnub ib lub txiaj nyiag, yog li mas tus tuaj ntxov los lig, Tswv Ntuj thiaj muab tib tug nqi zog zoo tib yam. 
Nej hnov zaj no mas nej twb paub tias vim tus tswv teb hlub thiab nyiam cov nyob dag tom tshav puam, nws thiaj hais kom lawv mus us zog tom nws daim teb, ces lawv thiaj yuav tau txais tus nqi zog los yug lawv tsev neeg.
Kwv tij Hmoob sawv daws, nyob hauv txoj kev ntseeg mas yog zoo li no, Tswv Ntuj tsis saib tias tus neeg twg tau los ntseeg ua ntej, tus twg los ntseeg tom qab; yam Tswv Ntuj saib mas yog sawv daws puav leej yog Tswv Ntuj me nyuam, Tswv Ntuj yuav pub rau lawv zoo xws tib yam.
Yam uas tus neeg ntseeg tsum tau ua txawm tias ntseeg tau ntev los nyuam qhuav tig los ntseeg, mas yog yus kav tsij ua yus qhov hauj lwm Tswv Ntuj hais kom yus ua kom zoo tshaj plaws, thiab yus txhob khib lwm tus mas yus thiaj tsim nyog txais lub txiaj nyiag Tswv Ntuj pub rau yus. Nyob zoo sawv daws.