ZAJ NYEEM NIAJ HNUB. Tim 18 lub 8 hli 2022 (Daily reflection)

ZAJ NYEEM HNUB TIM 18 LUB 8 HLI, HNUB TSIB LUB LIS PIAM 20 CAIJ NYOB NRUAB XYOO
COV LUS NYOB HAUV MAS TAIS NTAWV MOO ZOO (MT 22: 1-14)

Cov kwv tij Hmoob, Huab Tais Yes Xus zaj paj lug ntej tau hnov hnub no, mas yog Huab Tais Yes Xus tab tom ntuas kom peb muab Tswv Ntuj saib cia saum lub sam xeeb. Peb tsum ras txog Tswv Ntuj kev khuv leej mas Tswv Ntuj thiaj hu peb tuaj koom rooj tshoob hauv Ntuj Ceeb Tsheej, peb tsum ras ntsoov tias Tswv Ntuj yog tus nyob siab muaj hwj chim loj tas nrho, tsis kav nws hu peb tsoom neeg me tsis tsim nyog mus hauv Ntuj Ceeb Tsheej tuaj koom nws rooj tshoob, thiab peb yuav cim cia tias yog peb txais nkaus Tswv Ntuj lo lus hu mas Tswv Ntuj lub hwj chim yuav los roos peb. 
Tab sis mas cov kwv tij, vim peb lub siab qias siab tsis huv, peb tsuas xam txog kev noj haus, kev nrhiav yug peb txoj sia xwb, mas peb ib txhia thiaj tau hais rau Tswv Ntuj tias ‘hnub no kuv tsis xyeej os’, los hais tias ‘nej kav tsij noj ua ntej, ib pliag kuv mam tuaj.’ 
Cov kwv tij, yog muaj neeg tuaj hu nej mus koom ib rooj tshoob los ib rooj qav, mas nej cia li sawv tsees mus, los nej yuav tu nej lub cev, nej yuav hnav tsoos tsho kom zoo saib tso, es nej mam sawv kev mus? 
Peb cov Hmoob nyob lub ntuj qub qab mas kawg cia li sawv tsees mus zoo li ntawd tiag, tab sis nyob rau lub ntuj tiam no, mas sawv daws yuav tau npaj tu cev kom zoo saib tso, vim yus saib tau luag.
Hnub no Tswv Ntuj hu peb mus koom nws rooj tshoob mas peb kuj yuav tau ua li ntawd thiab. Peb yuav tsum yaug peb txoj sia kom huv, peb yuav tau xaiv hnav tsoos tsho kom phim rooj tshoob mas peb thiaj tsim nyog nkag mus hauv Ntuj Ceeb Tsheej. Nyob zoo sawv daws