ZAJ NYEEM NIAJ HNUB. Tim 19 lub 8 hli 2022 (Daily reflection)

ZAJ NYEEM HNUB TIM 19 LUB 8 HLI, NCO TXOG LEEJ NTSHIAB ZAM AWS DES
COV LUS NYOB HAUV MAS TAIS NTAWV MOO ZOO (MT 22: 34-40)

Kwv tij Hmoob sawv daws, niaj hnub no peb ua neej nyob mas peb tsum ua raws teb chaws txoj cai mas peb thiaj yuav nyob haum xeeb nrog lub teb chaws puas yog? Cov cai no yog tib neeg ua tus tsim los tswj tib neeg, yog lub teb chaws twg cov kws lij choj muaj lub siab lim hiam ces luag yuav tsa txoj cai kom luag tau tswj tau quab yuam lwm tus, tab sis yog lub teb chaws twg cov kws lij choj lub siab ncaj mas lawv yuav tsa txoj cai kom haum rau sawv daws.
Li ntawd mas tib neeg txoj cai lij choj thiaj muaj zoo thiab phem sib txuam. Tab sis Tswv Ntuj txoj cai mas tsuas muaj qhov zoo xwb.
Hnub no muaj ib tug Fas Lis Xais nug Huab Tais Yes Xus tias nyob hauv Mas Xes txoj cai mas lo lus twg loj dua cov. Ces Huab Tais Yes Xus thiaj hais tias yog lo lus tias ‘koj yuav muab tas koj lub siab, tas koj tus ntsuj plig, tas koj lub tswv yim los nyiam koj tus Huab Tais Tswv Ntuj. Koj yuav nyiam tus nyob ze koj ib yam nkaus li koj nyiam koj.’
Lo lus Huab Tais Yes Xus hais no mas yog Tswv Ntuj txoj cai pub rau tib neeg sawv daws, yog kom tas ntiaj teb neeg ua neej nyob hauv txoj kev sib nyiam. Yog nkawm niam txiv twg ua neej sib nyiam mas nkawd lub cuab yuav sov, yog cuab kwv tij twg txawj sib nyiam mas lawv yuav noj sib hlub haus sib cev, yog lub zos twg txawj sib nyiam mas lub zos ntawd yuav muaj lub zog loj. 
Kwv tij Hmoob, nej yuav nco ntsoov txog Tswv Ntuj txoj cai no mog! Nyiam Tswv Ntuj thiab nyiam lwm tus.
Nyob zoo sawv daws.