ZAJ NYEEM NIAJ HNUB. Tim 20 lub 8 hli 2022 (Daily reflection)

ZAJ NYEEM HNUB TIM 20 LUB 8 HLI, NCO TXOG LEEJ NTSHIAB NPES NAS
COV LUS NYOB HAUV MAS TAIS NTAWV MOO ZOO (MT 23: 1-12)

Kwv tij Hmoob sawv daws, nyob hauv neeg lub siab mas neeg xav kom lwm tus pom txog neeg lub txiaj ntsim, xav kom lwm tus hwm, lwm tus qhuas. Li ntawd, thaum neeg ua dab tsi mas neeg thiaj nyiam tshaj rau lwm tus paub, thiab neeg thiaj nyiam nrhiav suab npe, hwj chim. Tab sis hnub no Huab Tais Yes Xus xav kom peb thim xav, peb rov tig los soj ntsuam peb tus kheej saib peb puas ua li hais.
Huab Tais Yes Xus xav kom sawv daws pom tseeb mas nws thiaj muab cov Fas Lis Xais thiab cov Kws Ntawv Ntshiab los ua piv txwv hais, vim tias cov Fas Lis Xais thiab cov Kws Ntawv Ntshiab mas lawv yog cov neeg nto moo thiab muaj hwj chim, lawv nyiam qhia sawv daws kom ua coj Mais Xes txoj cai, tab sis lawv ntiag tug kiag mas lawv tsis ua raws. Lawv mus qhov twg mas lawv ua niag khav theeb kom sawv daws hwm.
Cov kwv tij, Huab Tais Yes Xus hais tias ‘tus loj dua cov nyob hauv nej, yuav ua nej tus tub txib.’ Yog tab tom qhia peb tias yog peb xav kom lwm tus pom txog peb txiaj ntsim, xav kom lwm tus hwm los qhuas mas peb txhob ua tus neeg muab hlob, taw tes hais kom lwm tus ua raws li peb hais, tab sis mas peb tsum yog tus nqes tes ua, peb tsum ua tus thawj cev tes raus hauv lub hub roj, peb tsum yog tus pib.
Kwv tij Hmoob sawv daws, muaj ib tug phooj ywg hais tias txij thaum pawg ntseeg hauv nws lub zos xaiv nws los ua tus coj mas nws sab kawg li, vim tas ib puas tsav yam los nws tsum yog tus ua. Txawm tias nws sab tsis kav nws zoo siab ua, vim nws xav tias yog nws ua pub rau Tswv Ntuj. Nyob zoo sawv daws.